తులసి.. ప్రతి భారతీయ లోగిళ్లలో తప్పనిసరిగా ఉండే ప్రత్యేక మొక్క. ఇది అటు ఆరోగ్యాన్ని చేకూర్చే ఔషద మొక్కగానూ, ఇటు దైవిక మొక్కగానూ ఇళ్లల్లో కొలువై ఉంటుంది. తులసి మొక్కను సాక్షాత్తూ శ్రీమహాలక్ష్మికి నివాస స్థానంగా భావిస్తారు. తులసిని పూజించడం, తులసి ముందు నిత్య దీపారాధన చేయడం వల్ల ఆ ఇల్లు సుఖసంతోషాలతో విలసిల్లుతుందని మన పెద్దలు చెబుతారు. అంతేకాదు.. తులసి మొక్క ఉన్న ఇంట్లోకి యమభటులు రాలేరనే మాట నానుడిలో ఉంది. అయితే ఇంట్లో కొత్త తులసి మొక్కను ఎప్పుడంటే అప్పుడు నాటడం మంచిదేనా అంటే కాదు.. అందుకు కొన్ని కారణాలు చెబుతున్నారు శాస్త్ర పండితులు..
ఇంట్లో ఏదైనా మొక్కను నాటే ముందు వాస్తు నియమాలు పాటించడం మంచిది. లేదంటే వాస్తు దోషం వచ్చే అవకాశం ఉంటుందట. వాస్తు ప్రకారం తులసి మొక్కను గురువారంరోజు నాటడం చాలా మంచిది. ఇదే శుభప్రదం. సాధారణంగానే గురువారాన్ని లక్ష్మీవారం అంటాం.
తులసి మొక్కలో లక్ష్మీదేవి నివాసం ఉంటుందని కూడా చెబుతాం. గురువారం తులసి మొక్కను ఇంట్లో నాటితే సాక్షాత్తు ఆ లక్ష్మీదేవిని ఇంట్లో కొలువు తీర్చినట్టే అవుతుంది.
తులసి మొక్కను శుక్రవారం కూడా నాటవచ్చట. కేవలం తులసి మొక్క అనే కాదు.. శుక్రవారం రోజు మొక్కలు నాటితే లక్ష్మీదేవి ఆశీర్వాదం లభిస్తుందట.
జీవితంలో మంచి అభివృద్ది, ఎదుగుదల ఉంటాయి.
తులసి మొక్కను ఇంట్లో ఉత్తరం లేదా ఈశాన్య దిశలో నాటడం మంచిది. ఈ దిశలలో మొక్కను నాటితే అది ఇంట్లో పాజిటివ్ ఎనర్జీని పెంచి.. కుటుంబసభ్యులకు మేలు చేస్తుంది.
ఆర్థిక సమస్యలున్నవారు గురువారం లేదా శుక్రవారం రోజులలో తులసి మొక్కను ఇంట్లో నాటడం వల్ల ఆర్థిక సమస్యలు తగ్గుతాయి. అలాగే ఇంట్లో గొడవలు, కలహాలు, ఇబ్బందులు ఉంటే.. అవన్నీ కూడా కేవలం తులసి మొక్కను నాటి నిత్య పూజ చేసుకోవడం వల్ల తగ్గుతాయని వాస్తుశాస్త్ర నిపుణులు చెబుతున్నారు.