జపం.. కలియుగంలో భక్తులకు మోక్షాన్ని ప్రసాదించే సాధనం. అందుకు నిదర్శనంగా మన ఆధ్మాత్మిక గ్రంథాలలో దీని విశిష్టతను అంతటా ప్రస్తావనకి తెచ్చారు. అలాంటి జపం వల్ల కలిగే ప్రయోజనాల గురుంచి ఇప్పుడు తెలుసుకుందాం:
- జపించడం/ జపం చేయడం అంటే తనలో తాను స్మరించుకోవడం అని అర్థం.‘జపం’ అంటే మాటకు- ‘జ’కారో జన్మవిచ్ఛేదః ‘ప’కారః పాపనాశనః… అనే ప్రతిపదార్థం వస్తుంది.
- ఏదిఏమైనా జపం అనేది తనకు ఇష్టమైన భగవంతుని నామాన్ని కానీ, మంత్రాన్ని కానీ తరచూ స్మరించుకోవడం.
- జపం గురించిన ప్రస్తావన ఆనాదిగా వినిపిస్తూనే ఉంది. వేదాలలో తొలిసారి కనిపించిన ఈ జపం.. మనుస్మృతి, పతంజలి యోగసూత్రాలలో కూడా కనిపిస్తుంది. ఇక భగవద్గీతలో శ్రీకృష్ణుడు యజ్ఞాలలో తాను జపయజ్ఞాని అని స్పష్టంగా పేర్కొంటాడు.
- భారతీయ సంస్కృతి ప్రభావంతో సిక్కు, క్రైస్తవ, బౌద్ధ, జైన మతాలలో సైతం వేర్వేరు రూపాలలో ఈ జపం అనేది ప్రాచుర్యం పొందింది.
- జపాన్ని మూడు రకాలుగా పేర్కొంటారు. పైకి వినిపించేట్లుగా చేసేది వాచక జపం. వినపడీ వినపడనట్లుగా చేసుకునేది ఉపాంశుజపం. మనసులోనే సాగిపోయేది మానసిక జపం. వీటిలో ఒకదాన్ని మించిన ఫలితం మరో జపం ఇస్తుందని ఉపనిషత్తులు చెబుతున్నాయి.
- అంటే మనసులో నిశ్చలంగా సాగిపోయే జపానికే మన పెద్దలు ప్రాముఖ్యతనిచ్చారన్నమాట.
- జపం అంటేనే ప్రార్థనకు క్లుప్తమైన రూపం అని అర్థం. కాబట్టి మనకి ఇష్టమైన దేవత గురించిన స్మరణను జపంగా మలచుకోవచ్చు.
- దీనికి ఫలానా సమయంలో చేయాలన్న కాలనియమం ఏది లేదు. ఫలానావారే చేయాలన్న కట్టడి లేదు. కావల్సిందల్లా నిర్మలమైన మనసు, చేయాలన్నా తపన మాత్రమే.
- జపంతో నిరంతరం భగవన్నామ స్మరణ చేయడం వీలవుతుంది. దీనివల్ల ఇంద్రియాలు స్థిమితపడతాయి.
- మనం ఏ మంత్రాన్నైతే జపిస్తున్నామో అది మన మనసులోకి అంతకంతకూ గాఢంగా చొచ్చుకుపోతుంది.
- ఇలా కొన్నాళ్లు సాధన చేసిన తరువాత సాధకుడు ‘అజపజపం’ అనే స్థితిని చేరుకుంటాడట. అంటే జపం చేయకున్నా కూడా మనసులోని ఒక భాగంలో నామస్మరణ నిర్విరామంగా సాగిపోతూనే ఉండటం.
- మిగతా జీవుల సంగతేమో కానీ మనిషికి, శబ్దానికీ మధ్య గాఢమైన సంబంధం ఉంది. మనిషి శబ్దం ద్వారానే తన భావాలను వ్యక్తపరుస్తాడు. శబ్దాన్ని వినడం ద్వారానే ఎదురుగా ఏం జరుగుతోందో అవగతం చేసుకుంటాడు. మనిషి వినే మాటకి అనుగుణంగా అతనిలోని మనసు ప్రతిస్పందిస్తుంది. అందుకనేమో ఈ సృష్టి యావత్తూ ‘ఓం కారం’ అనే శబ్దం నుంచి ఉత్పన్నం అయిందన్న వాదనలు హిందూధర్మంలో మనకు వినిపిస్తుంటాయి.
- అలాంటి శబ్దాన్ని ఉపాసించడం ద్వారా మనసుని లయం చేసుకోవడమే జపంలో దాగివున్న గొప్ప అంతరార్ధం!