Iran And Israel War: ఇరాన్-ఇజ్రాయెల్ మధ్య యుద్ధం రోజురోజుకూ ఉద్రిక్తంగా మారుతోంది. ఇరాన్ ఇజ్రాయెల్‌పై క్లస్టర్ బాంబులను ప్రయోగించినట్లు ఆరోపణలు వచ్చాయి. అయితే ఈ ఆరోపణల్లో నిజమెంత…? ఈ బాంబులు ఎందుకంత ప్రమాదకరం? 120కి పైగా దేశాలు ఎందుకు వీటిని నిషేధించాయి? భారత్ క్లస్టర్ బాంబుల నిషేదంపై సంతకం ఎందుకు చేయలేదు..?
క్లస్టర్ బాంబులు అత్యంత వివాదాస్పద, ప్రమాదకర ఆయుధాలు. ఈ బాంబులు గాలిలో లేదా భూమి నుంచి ప్రయోగించబడతాయి. ఒక పెద్ద షెల్ గాలిలో విడిపోయి, వందల చిన్న బాంబులను, లేదా సబ్‌మ్యూనిషన్స్‌ను, చాలా ప్రాంతంలో వేస్తోంది. ఈ చిన్న బాంబులు ఫుట్‌బాల్ మైదానాలంత విస్తీర్ణంలో పడి, దీనిని వదలకుండా నాశనం చేస్తాయి. వీటిలో కొన్ని పేలకుండా మిగిలిపోయి, యుద్ధం ముగిసిన ఏళ్ల తర్వాత కూడా పౌరులకు ముప్పుగా మారతాయి. లావోస్‌లో 1960-70 దశకాల్లో వాడిన క్లస్టర్ బాంబులు ఇప్పటికీ అక్కడి ప్రజలకు ప్రమాదకరంగా ఉన్నాయి. లెబనాన్‌లో 2006లో ఇజ్రాయెల్ వాడిన క్లస్టర్ బాంబుల వల్ల ఇప్పటికీ పౌరులు మరణిస్తున్నారు. ఈ బాంబులు యుద్ధ ప్రాంతాలను మైన్‌ఫీల్డ్‌లుగా మార్చేస్తాయి, ముఖ్యంగా పిల్లలు, రైతులు, అమాయక పౌరులు ఈ పేలని బాంబుల బారిన పడుతున్నారు. ఈ ఆయుధాలు సైనిక లక్ష్యాలను ధ్వంసం చేయడానికి ఉద్దేశించినప్పటికీ, వీటి పేలే స్వభావం వల్ల పౌరులపై తీవ్ర ప్రభావం చూపుతాయి.
క్లస్టర్ బాంబులు పౌరులకు కలిగించే దీర్ఘకాలిక ముప్పు కారణంగా అంతర్జాతీయంగా వీటిపై వ్యతిరేకత వ్యక్తమవుతోంది. 2008లో, 120కి పైగా దేశాలు క్లస్టర్ మ్యూనిషన్స్ కన్వెన్షన్ ఒప్పందంపై సంతకం చేసి, ఈ బాంబుల ఉత్పత్తి, నిల్వ, బదిలీ, ఉపయోగాన్ని నిషేధించాయి. ఈ ఒప్పందం యుద్ధం తర్వాత కూడా పేలని సబ్‌మ్యూనిషన్స్ వల్ల కలిగే నష్టాన్ని గుర్తించింది. అయితే, ఇరాన్, ఇజ్రాయెల్, అమెరికా, రష్యా, చైనా, భారత్ వంటి దేశాలు ఈ ఒప్పందంలో చేరలేదు. ఈ బాంబులు ఆర్థిక, సామాజిక అభివృద్ధిని అడ్డుకుంటాయి, యుద్ధం తర్వాత పునరావాస కార్యక్రమాలను కష్టతరం చేస్తాయి. పేలని సబ్‌మ్యూనిషన్స్‌ను తొలగించడం ఖరీదైన, సమయం తీసుకునే, ప్రమాదకర ప్రక్రియ. లావోస్‌లో 1970ల నుంచి ఇప్పటివరకు 20,000 మంది పేలని క్లస్టర్ బాంబుల వల్ల ప్రభావానికి లోనయ్యారు. అంతర్జాతీయ రెడ్ క్రాస్ కమిటీ ప్రకారం, ఈ ఆయుధాలు రెండవ ప్రపంచ యుద్ధంలో మొదటిసారి ఉపయోగించబడ్డాయి, ఆ తర్వాత కోల్డ్ వార్ సమయంలో పెద్ద ఎత్తున నిల్వ చేయబడ్డాయి. ఈ నిషేధం ఉన్నప్పటికీ, కొన్ని దేశాలు ఇప్పటికీ వీటిని ఉపయోగిస్తున్నాయి, ఇది అంతర్జాతీయ ఆందోళనకు కారణమవుతోంది.
ఇరాన్-ఇజ్రాయెల్ మధ్య యుద్ధం ఏడు రోజులుగా కొనసాగుతోంది, ఈ సంఘర్షణలో క్లస్టర్ బాంబుల ఉపయోగం కొత్త వివాదాన్ని రేపింది. ఇజ్రాయెల్ ఆరోపణల ప్రకారం, ఇరాన్ ఒక బాలిస్టిక్ మిసైల్‌తో క్లస్టర్ బాంబును ఇజ్రాయెల్‌లోని ఓర్ యెహుదా ప్రాంతంలో ప్రయోగించింది. ఈ మిసైల్ గాలిలో 7 కిలోమీటర్ల ఎత్తులో విడిపోయి, 20 చిన్న సబ్‌మ్యూనిషన్స్‌ను 8 కిలోమీటర్ల వ్యాసంలో చల్లింది. ఈ చిన్న బాంబులు సెల్ప్ గైడెన్స్ లేకుండా భూమిపై పడి పేలుతాయి, కానీ కొన్ని పేలకుండా మిగిలిపోయాయి. ఒక సబ్‌మ్యూనిషన్ ఆజోర్ పట్టణంలో ఒక ఇంటిని తాకి నష్టం కలిగించింది, అయితే ఎవరికీ ఏమీ కాలేదు. ఇజ్రాయెల్ సైన్యం ఈ బాంబులను తొలగించేందుకు ప్రయత్నిస్తోంది. అయినప్పటికీ ఇంకా కొన్ని పేలని బాంబులు ఉండొచ్చని హెచ్చరించింది. ఈ ఆయుధాలు జనసాంద్రత ఎక్కువగా ఉన్న ప్రాంతాల్లో వాడినప్పుడు విస్తృత నష్టాన్ని కలిగిస్తాయి. అయితే ఇరాన్ యుద్ధ నీతినియమాలను ఉల్లంఘిస్తోందని ఇజ్రాయెల్ ఆరోపిస్తోంది. ఇరాన్ మాత్రం ఈ దాడి సోరోకా ఆసుపత్రి సమీపంలోని సైనిక లక్ష్యాలపై జరిగిందని, ఆసుపత్రిని ఉద్దేశపూర్వకంగా లక్ష్యంగా చేసుకోలేదని వాదిస్తోంది. Iran And Israel War.
ఇరాన్-ఇజ్రాయెల్ యుద్ధం పౌరుల జీవితాలను గందరగోళంలోకి నెట్టివేసింది. ఇరాన్‌లో న్యూక్లియర్ సైట్లు, సైనిక కేంద్రాలను లక్ష్యంగా ఇజ్రాయెల్ దాడులు చేస్తోంది. అలాగే ఇజ్రాయెల్‌పై ఇరాన్ మిసైల్స్ తో విరుచుకుపడుతోంది. సోరోకా ఆసుపత్రిపై దాడి తీవ్ర వివాదాన్ని రేపింది, ఇజ్రాయెల్ దీనిని యుద్ధ నేరంగా పేర్కొంది. ఈ యుద్ధంలో క్లస్టర్ బాంబుల వాడకం అంతర్జాతీయ ఆందోళనను పెంచింది, ఎందుకంటే ఈ బాంబులు యుద్ధం తర్వాత కూడా పౌరులకు ముప్పుగా మారతాయి. హ్యూమన్ రైట్స్ వాచ్ నిపుణులు ఈ ఆయుధాలు సైనికులు, పౌరుల మధ్య తేడాను గుర్తించవని, దీర్ఘకాలంగా ల్యాండ్‌మైన్‌ల వలె పనిచేస్తాయని హెచ్చరించారు. మరోవైపు ఈ యుద్ధం అపేందుకు పలు దేశాలు దౌత్యపరమైన పరిష్కారానికి ప్రయత్నిస్తున్నాయి, కానీ ఈ యుద్ధం మరింత విస్తరిస్తే మధ్యప్రాచ్యంలో అశాంతి నెలకొనే పరిస్థితి ఉందని ఐక్యరాష్ట్ర సమితి ఆందోళన వ్యక్తం చేసింది.