అమెరికా అధ్యక్షుడు డొనాల్డ్ ట్రంప్, ప్రపంచంలోనే అత్యంత ధనవంతుడైన ఎలాన్ మస్క్ మధ్య స్నేహం ఒకప్పుడు బలంగా ఉండేది, కానీ ఇప్పుడు ఆ బంధం బీటలు వారింది. ఇటీవల వీరిద్దరి మధ్య తీవ్రమైన వివాదం చోటుచేసుకుంది, ఇది సోషల్ మీడియాలో బహిరంగ గొడవగా మారింది. ఇప్పుడు మస్క్ కొత్తగా అమెరికా పార్టీ అనే రాజకీయ పార్టీని స్థాపించే ఆలోచనలో ఉన్నారని ప్రచారం జరుగుతోంది. ఈ వివాదం ఎందుకు రగిలింది? మస్క్ ఆరోపణలు ఏమిటి? కొత్త పార్టీ స్థాపన ఎంతవరకు నిజం?
డొనాల్డ్ ట్రంప్, ఎలాన్ మస్క్ మధ్య గొడవ ఇప్పుడు అమెరికా రాజకీయాల్లో సంచలనంగా మారింది. ఒకప్పుడు సన్నిహిత మిత్రులైన వీరిద్దరూ, ఇప్పుడు బహిరంగంగా ఘర్షణకు దిగారు. ట్రంప్ బడ్జెట్ బిల్లుపై మస్క్ విమర్శలు, ట్రంప్ కాంట్రాక్టుల రద్దు బెదిరింపులు, మస్క్ ఎప్‌స్టీన్ ఫైల్స్ ఆరోపణలు ఈ వివాదాన్ని రగిలించాయి. మస్క్ కొత్తగా అమెరికా పార్టీ పెట్టబోతున్నారనే చర్చ కూడా జోరందుకుంది. ఒకరేమో ప్రపంచంలో అత్యంత శక్తిమంతమైన దేశానికి అధిపతి. మరొకరేమో ప్రపంచంలో అత్యంత ధనవంతుడైన పారిశ్రామికవేత్త. వీరిద్దరి మధ్య సామాజిక మాధ్యమాల వేదికగా సాగిన మాటల యుద్ధం ప్రపంచవ్యాప్తంగా ప్రకంపనలు రేపింది. ట్రంప్, మస్క్ ఒకరిపై ఒకరు తీవ్రస్థాయిలో ఆరోపణలు చేసుకున్నారు. అధ్యక్ష ఎన్నికల్లో ట్రంప్ విజయానికి తానే కారణమని మస్క్ అంటే, తానెవరి సాయం లేకుండా నెగ్గానని ట్రంప్ సమాధానమిచ్చారు.
ఎలాన్‌కు తనకు మధ్య మంచి బంధం ఉండేదని.. ఇప్పుడు అది ఉందో లేదో తెలియదని ట్రంప్ వ్యాఖ్యానించారు. అప్పటి నుంచి ఇద్దరి మధ్య మాటలు తూటాలు సామాజిక మాధ్యమాల్లో పేలాయి. ట్రంప్‌ను అభిశంసించాలంటూ ఓ నెటిజన్‌ పెట్టిన పోస్టును మస్క్ సమర్ధించారు. ఉపాధ్యక్షుడు జేడీ వాన్స్‌తో ఆ స్థానాన్ని భర్తీ చేయాలని ఆ పోస్టులో ఉంది. దీన్ని మస్క్ రీ పోస్టు చేసి.. అవును అని రాసుకొచ్చారు. వరుసగా ట్రంప్‌నకు వ్యతిరేకంగా పోస్టులు వేస్తున్న సమయంలో మస్క్ ఓ ఆసక్తికర చర్చకూ తెర లేపారు. కొత్త రాజకీయ పార్టీ ఏర్పాటు గురించి ప్రస్తావించారు. 80 శాతం అమెరికన్లకు ప్రాతినిధ్యం వహించేలా కొత్త పార్టీ స్థాపించడానికి ఇది తగిన సమయమా అంటూ తన 22 కోట్ల ఫాలోవర్లను ఎక్స్‌లో ప్రశ్నించారు.
అటు మస్క్ ఆరోపణలపై తన సొంత సామాజిక మాధ్యమం ట్రూత్‌ వేదికగా ట్రంప్ స్పందించారు. దేశ బడ్జెట్‌లో డబ్బులు ఆదా చేయాలంటే ఎలాన్ సంస్థలకు ప్రభుత్వ రాయితీలు, కాంట్రాక్టులు రద్దు చేస్తే సరిపోతుందని అన్నారు. కాంట్రాక్టులు రద్దు చేస్తానన్న ట్రంప్ ప్రకటనకు మస్క్ ఘాటుగానే స్పందించారు. స్పేస్‌ఎక్స్‌కు చెందిన డ్రాగన్‌ స్పేస్‌క్రాఫ్ట్‌ సేవలను నిలిపివేస్తున్నామని పేర్కొన్నారు. ఆ తర్వాత మస్క్ తన మాటలను వెనక్కి తీసుకున్నారు. అయితే ట్రంప్ బెదిరింపులకు మస్క్ మరింత రెచ్చిపోయి, జెఫ్రీ ఎప్‌స్టీన్ సెక్స్ కేసులో ట్రంప్ పాత్ర ఉందని సంచలన ఆరోపణలు చేశారు. ఎప్‌స్టీన్ కేసు దస్త్రాలను ప్రభుత్వం పూర్తిగా బహిర్గతం చేయకపోవడానికి ట్రంప్ ప్రమేయమే కారణమని ఆరోపించారు. జెఫ్రీ ఎప్‌స్టీన్‌పై చిన్నారులపై లైంగిక వేధింపుల ఆరోపణలు ఉన్నాయి. 2019లో విచారణకు ముందే అతను జైలులో ఆత్మహత్య చేసుకున్నాడు. ఈ ఆరోపణలు వివాదాన్ని మరింత రెచ్చగొట్టాయి. మస్క్ ఇంకా ఒక అడుగు ముందుకేసి, 2024 అమెరికా అధ్యక్ష ఎన్నికల్లో తన మద్దతు వల్లే ట్రంప్, రిపబ్లికన్ పార్టీ గెలిచిందని.. లేకపోతే డెమోక్రాట్లు ప్రతినిధుల సభలో ఆధిపత్యం సాధించేవారని, సెనెట్‌లో రిపబ్లికన్లు కేవలం 51-49 ఆధిక్యంతో ఉండేవారని పేర్కొన్నారు. దీనికి ట్రంప్ స్పష్టంగా స్పందిస్తూ, తన విజయానికి మస్క్ మద్దతు అవసరం లేదని తేల్చి చెప్పారు.
ట్రంప్ హత్యాయత్న సమయంలో మస్క్ ఆయనకు అండగా నిలవడంతో వీరి స్నేహం మొదలైంది. అప్పట్లో మస్క్, ట్రంప్ ఎన్నికల యంత్రాంగంలో కీలక పాత్ర పోషించారు. డిపార్ట్‌మెంట్ ఆఫ్ గవర్నమెంట్ ఎఫీషియన్సీ కు నాయకత్వం వహించారు, కానీ ఇటీవల ఆ బాధ్యతల నుంచి తప్పుకున్నారు. ఈ గొడవకు కొద్ది రోజుల ముందు, ట్రంప్ మస్క్‌కు శ్వేతసౌధంలో బంగారు తాళం బహుమతిగా ఇచ్చారు. కానీ, బడ్జెట్ బిల్లు విషయంలో విభేదాలతో అంతా మారిపోయింది. ఈ వివాదం మరో కొత్త మలుపు తీసుకుంది – మస్క్ అమెరికా పార్టీ అనే కొత్త రాజకీయ పార్టీని స్థాపించే ఆలోచనలో ఉన్నారని ఊహాగానాలు సాగుతున్నాయి. మస్క్ ఈ ఆలోచనను బహిరంగంగా ధృవీకరించలేదు, కానీ సోషల్ మీడియాలో ఈ చర్చ జోరందుకుంది. ఈ గొడవ అమెరికా రాజకీయాల్లో ఎలాంటి మార్పులు తెస్తుంది? ట్రంప్, మస్క్ మధ్య ఈ వివాదం ఎక్కడి వరకు వెళ్తుంది? ఈ ప్రశ్నలు రాబోయే రోజుల్లో సమాధానం కోసం ఎదురుచూస్తున్నాయి
డొనాల్డ్ ట్రంప్‌తో ఎలాన్ మస్క్‌కు చెలరేగిన వివాదం అటు రష్యాకు కూడా పాకింది. ఈ నేపథ్యంలో మస్క్‌కు రాజకీయ ఆశ్రయం ఇవ్వడానికి రష్యా సిద్ధంగా ఉందని ప్రకటించింది. రష్యా రాష్ట్ర డూమా అంతర్జాతీయ వ్యవహారాల కమిటీ మొదటి డిప్యూటీ చైర్మన్ డిమిత్రీ నోవికోవ్, మస్క్‌కు అవసరమైతే రష్యాలో ఆశ్రయం ఇవ్వవచ్చని, అయితే మస్క్ పూర్తిగా భిన్నమైన ఆట ఆడుతున్నాడు కాబట్టి ఆశ్రయం అవసరం లేదని చెప్పారు. ఈ ఆఫర్‌ను రష్యా వ్యంగ్యంగా, ట్రంప్-మస్క్ వివాదాన్ని ఎగతాళి చేసేందుకు ఉపయోగించినట్టు కనిపిస్తోంది. అటు మాజీ రష్యా అధ్యక్షుడు డిమిత్రీ మెద్వెదేవ్, ట్రంప్, మస్క్ మధ్య శాంతి చర్చలకు మధ్యవర్తిత్వం వహించడానికి సిద్ధమని, బదులుగా స్టార్‌లింక్ షేర్లు తీసుకుంటామని వ్యంగ్యంగా పేర్కొన్నారు. ఈ ఆఫర్లు రష్యా రాజకీయ నాయకులు ట్రంప్-మస్క్ గొడవను ఎగతాళి చేయడానికి, అమెరికాలో గందరగోళాన్ని హైలైట్ చేయడానికి చేసిన వ్యూహాత్మక ప్రయత్నంగా కనిపిస్తున్నాయి. క్రెమ్లిన్ అధికార ప్రతినిధి డిమిత్రీ పెస్కోవ్ మాత్రం ఈ వివాదాన్ని అమెరికా అంతర్గత విషయంగా పేర్కొంటూ, రష్యా జోక్యం చేసుకోబోదని స్పష్టం చేశారు.
