Chinese Foreign Minister’s visit: ఇటు భారత్, అటు పాకిస్తాన్.. రెండు దేశాల్లోను చైనా విదేశాంగ మంత్రి వాంగ్ యి పర్యటన ప్రాముఖ్యత సంతరించుకుంది. భారత్ లో ప్రధాని మోదీ, విదేశాంగ మంత్రి జైశంకర్, జాతీయ భద్రతా సలహాదారు అజిత్ దోవెల్‌తో కీలక చర్చలు జరిపారు వాంగ్. ఇప్పుడు పాకిస్తాన్‌లో వ్యూహాత్మక సంభాషణల కోసం వెళ్తున్నాడు. అమెరికా అధ్యక్షుడు ట్రంప్ విధించిన సుంకాలు భారత్‌పై ఒత్తిడి పెంచిన నేపథ్యంలో, చైనాతో భారత్ సంబంధాలు ఎటు వెళ్తున్నాయి? సరిహద్దు, వాణిజ్యం, రక్షణ అంశాలపై ఏం చర్చలు జరిగాయి? వాంగ్ యి పాకిస్తాన్ పర్యటనపై భారత్‌లో ఎందుకు ఆందోళన?
చైనా విదేశాంగ మంత్రివవాంగ్ యి భారత్‌లో పర్యటించి, ప్రధాని మోదీతో సమావేశమయ్యారు. ఈ సందర్భంగా చైనా అధ్యక్షుడు జీ జిన్పింగ్, మోదీని ఆగస్టు 31-సెప్టెంబర్ 1న మధ్య జరిగే షాంఘై కోఆపరేషన్ ఆర్గనైజేషన్ శిఖరాగ్ర సమావేశానికి ఆహ్వానించారు. 2024 అక్టోబర్‌లో కజాన్‌లో జిన్పింగ్‌తో జరిగిన చర్చల తర్వాత భారత్-చైనా సంబంధాలు స్థిరంగా మెరుగవుతున్నాయి. పరస్పర గౌరవం, సున్నితత్వంతో ముందుకు సాగుతున్నాం అని మోదీ తెలిపారు.
విదేశాంగ మంత్రి జైశంకర్‌తో వాంగ్ యి విస్తృత చర్చలు జరిపారు. సరిహద్దు శాంతి, వాణిజ్యం, పరస్పర సంబంధాలు, కైలాస్ మానససరోవర్ యాత్ర, విమాన సేవల పునఃప్రారంభం, నది డేటా పంచుకోవడం, సరిహద్దు వాణిజ్యం వంటి అంశాలపై దృష్టి సారించారు. విభేదాలు వివాదాలుగా మారకూడదు, పోటీ సంఘర్షణగా మారకూడదు అని జైశంకర్ నొక్కిచెప్పారు. భారత్, చైనా ఒకదానినొకటి భాగస్వాములుగా చూడాలి, ప్రత్యర్థులుగా కాదు అని వాంగ్ యి పేర్కొన్నారు.
జాతీయ భద్రతా సలహాదారు అజిత్ దోవెల్‌తో 24వ రౌండ్ స్పెషల్ రిప్రజెంటేటివ్స్ సరిహద్దు చర్చలు జరిగాయి. 2020 గల్వాన్ వాలీ ఘర్షణ తర్వాత సరిహద్దులో ఉద్రిక్తత తగ్గించడం, శాంతి నెలకొల్పడంపై దృష్టి పెట్టారు. 2024 అక్టోబర్‌లో డెమ్చోక్, డెప్సాంగ్‌లో దళాల విడదీసుకోవడంతో ఉద్రిక్తత తగ్గినప్పటికీ, పూర్తి డీ-ఎస్కలేషన్ ఇంకా జరగలేదు. సరిహద్దులో శాంతి భారత్-చైనా సంబంధాలకు పునాది. న్యాయమైన, పరస్పర అంగీకార పరిష్కారం కోసం కట్టుబడి ఉన్నాంవఅని మోదీ స్పష్టం చేశారు.
వాంగ్ యి భారత్ పర్యటన తర్వాత పాకిస్తాన్‌కు వెళ్లి, ఉప ప్రధాని ఇష్హాక్ దార్‌తో ఆరవ పాకిస్తాన్-చైనా విదేశాంగ మంత్రుల వ్యూహాత్మక సంభాషణలను నిర్వహించనున్నారు. ఆల్-వెదర్ స్ట్రాటజిక్ కోఆపరేటివ్ పార్టనర్‌షిప్‌ను బలోపేతం చేయడం, ఆర్థిక, సైనిక సహకారాన్ని పెంచడంవఈ పర్యటన లక్ష్యమని పాకిస్తాన్ పేర్కొంది. అయితే, ఈ పర్యటన భారత్‌లో ఆందోళన కలిగిస్తోంది, ముఖ్యంగా చైనా-పాకిస్తాన్ ఎకనామిక్ కారిడార్ వివాదాస్పద భూభాగం గుండా వెళ్లడం వల్ల ఇప్పటికే అనేక విభేదాలు ఏర్పడ్డాయి.
ఆపరేషన్ సింధూర్ సమయంలో చైనా పాకిస్తాన్‌కు సహకరించిందని భారత్ ఆరోపణలు చేసింది. 2025 మేలో పహల్గామ్ ఉగ్రవాద దాడి తర్వాత జరిగిన ఈ ఆపరేషన్‌లో, చైనా భారత సైనిక కదలికలపై రియల్-టైమ్ సమాచారం అందించిందని లెఫ్టినెంట్ జనరల్ రాహుల్ ఆర్ సింగ్ వెల్లడించాడు. పాకిస్తాన్ ముందు వరుసలో ఉండగా, చైనా అన్ని విధాలా సహకరించింది అని ఆయన ఒక కార్యక్రమంలో చెప్పారు. ఈ ఆరోపణలు చైనా నిష్పాక్షికతపై భారత్‌లో అనుమానాలను రేకెత్తించాయి.
వాంగ్ యి పాకిస్తాన్ పర్యటనపై భారత్‌లో తీవ్ర చర్చ జరుగుతోంది. చైనా భారత్‌తో సంబంధాలను మెరుగుపరుస్తూనే, పాకిస్తాన్‌తో “ఆల్-వెదర్” భాగస్వామ్యాన్ని బలపరుస్తోందని విశ్లేషకులు భావిస్తున్నారు. చైనా ఈ రెండు దక్షిణాసియా దేశాల మధ్య సమతుల్యత కోసం ప్రయత్నిస్తోందని, కానీ CPEC వంటి ప్రాజెక్టులు, ఆపరేషన్ సింధూర్‌లో చైనా పాత్రపై ఆరోపణలు భారత్‌లో అనుమానాలను పెంచుతున్నాయి. అమెరికా విధించిన సుంకాల నేపథ్యంలో, చైనా SCO శిఖరాగ్ర సమావేశానికి ముందు ప్రాంతీయ కూటములను బలపరచాలని చూస్తోందని భారత్ అనుమానిస్తోంది. Chinese Foreign Minister’s visit.
చైనా భారత్‌తో సంబంధాలను మెరుగుపరచాలని చూస్తోందా లేక రెండు వైపులా రాజకీయ ఆట ఆడుతోందా? ఈ ప్రశ్నకు సమాధానం SCO శిఖరాగ్ర సమావేశం తర్వాత స్పష్టమవుతుంది. భారత్‌కు సరిహద్దు శాంతి, వాణిజ్య సహకారం ముఖ్యమైనప్పటికీ, చైనా-పాకిస్తాన్ సంబంధాలు, ఆపరేషన్ సింధూర్ ఆరోపణలు భారత్‌ను అప్రమత్తంగా ఉంచుతున్నాయి. సెప్టెంబర్ 1న తియాంజిన్‌లో జరిగే SCO సమావేశం ఈ త్రిముఖ సంబంధాలకు కొత్త దిశను చూపిస్తుంది!
Join with us: https://whatsapp.com/channel/0029VarK7kPHAdNW7c2XLY2q