Trump Tariffs: భారత్‌పై అమెరికా ఒత్తిడి పెరుగుతోందా? అమెరికా ఒత్తిళ్లకు ఇండియా తలొగ్గుతోందా? ఏదో ఒక రకంగా అమెరికా తన లాభాలను పెంచుకుంటూ.. ఇండియాకి నష్టం కలిగిస్తోందా? ఈ విషయంలో కేంద్ర ప్రభుత్వం మెతక వైఖరి అవలంబిస్తోందా? అందుకే ట్రంప్, భారత్ ప్రయోజనాలు దెబ్బతీస్తున్నారా?
భారత్‌పై అమెరికా ఒత్తిడి పెరుగుతోంది. అమెరికా నుంచి మొక్కజొన్నలను దిగుమతి చేసుకునే దిశగా భారత్ ప్లాన్ చేస్తుంది. ఈనెల 26న జరిగిన భారత-అమెరికా వాణిజ్య చర్చల్లో ఈ విషయం కీలక అంశంగా మారింది. వాణిజ్య మంత్రి పియూష్ గోయల్ అధ్యక్షతన వాషింగ్టన్‌లో జరిగిన సమావేశాల్లో రెండు దేశాలు ఒక వ్యవహారిక ఒప్పందానికి దగ్గరయ్యాయి. అమెరికా అధ్యక్షుడు డొనాల్డ్ ట్రంప్… రష్యా నుంచి చమురు దిగుమతులపై ఒత్తిడి చేస్తూ 50 శాతం సుంకాలు విధించడంతో భారత్ పరిస్థితి కష్టంగా మారింది. సుంకాలు తగ్గించాలంటే.. తమ మొక్కజొన్నలను భారత్ తీసుకోవాలని ట్రంప్ డిమాండ్ చేస్తున్నారు. అదే జరిగితే వాటిని ఇథనాల్ ఉత్పత్తికి వాడుకోవాలని భారత్ ప్లాన్ చేస్తోంది.
అమెరికా నుంచి మొక్కజొన్నలు ఇండియాకి వస్తే.. 5,000 కోట్ల రూపాయల మొక్కజొన్నల వ్యాపారాన్ని ప్రభావితం చేసే ఛాన్స్ ఉంది. భారత్… ప్రపంచంలో మొక్కజొన్న ఉత్పత్తిలో ఫస్ట్ ప్లేస్ లో ఉంది. 2024-25లో కేవలం 0.97 మిలియన్ టన్నులు మాత్రమే దిగుమతి చేసుకుంది. ఇప్పుడు ఇథనాల్ కోసం 5 లక్షల టన్నుల వరకు 15 శాతం సుంకంతో దిగుమతి చేసుకునే ప్లాన్ ఉంది. ఇది అమెరికా వ్యవసాయ రంగానికి ప్రయోజనకరంగా మారవచ్చు, కానీ ఈ అంశం మన రైతులకు భయాలు తెప్పిస్తోంది. ఈ అంగీకారం భారత్‌కు… వాణిజ్య ఒప్పందం కుదుర్చుకోవడంలో సహాయపడుతుందని భారత వాణిజ్య మంత్రిత్వ శాఖ తెలిపింది.
ప్రధానమంత్రి నరేంద్ర మోదీ ఇటీవల “రైతులకు నష్టం కలిగే ఏ నిర్ణయమూ తీసుకోను” అని ప్రకటించారు. ఈ ప్రకటన మొక్కజొన్న దిగుమతి విషయంలో ప్రధాన పాత్ర పోషిస్తోంది. మోదీ-ట్రంప్ మధ్య త్వరలో జరిగే భేటీలో ఈ అంశం చర్చకు వస్తుందని అమెరికా విదేశాంగ అధికారులు చెబుతున్నారు. ఇది రెండు దేశాల మధ్య సానుకూల సంబంధాలను బలోపేతం చేస్తుందని వారు ఆశాభావం వ్యక్తం చేశారు. భారత్… ఇథనాల్ కోసం మొక్కజొన్న దిగుమతి చేస్తే, అది ఆహార భద్రతకు ఆటంకం కాదని ప్రభుత్వం వాదిస్తోంది. ఇది పర్యావరణ లక్ష్యాలకు సహాయపడుతుందని అంటోంది.
అమెరికా వాణిజ్య మంత్రి హొవార్డ్ లుట్నిక్ ఇటీవల న్యూఢిల్లీలో జరిగిన చర్చల్లో “140 కోట్ల మంది జనాభా ఉన్న భారత్‌లో మా మొక్కజొన్నలు కొనరా” అని అక్కసు చూపారు. ఇది భారత్‌పై ఒత్తిడిని పెంచింది. ప్రపంచంలో అత్యధిక మొక్కజొన్న ఉత్పత్తి చేసే అమెరికా, 182.8 బిలియన్ డాలర్ల వ్యవసాయ ఎగుమతులతో ముందంజలో ఉంది. భారత్ 2024-25లో 59 బిలియన్ డాలర్ల వ్యవసాయ దిగుమతులు చేసుకుంది, అందులో మొక్కజొన్న పాత్ర పరిమితం. ఇథనాల్ మిక్సింగ్ ప్రోగ్రాంని పెంచుకోవాలంటే అమెరికా మొక్కజొన్న అవసరమని భారత్ అంటోంది. ఇది 20% ఇథనాల్ లక్ష్యాన్ని సాధించడానికి సహాయపడుతుందని అధికారులు చెబుతున్నారు.
వ్యవసాయ నిపుణులు మాత్రం… ఈ దిగుమతులు దేశీయ మార్కెట్ ధరలను పడిపోయేలా చేస్తాయని హెచ్చరిస్తున్నారు. భారత్ వ్యవసాయ ఎగుమతులు 2024-25లో 86.5 బిలియన్ డాలర్లకు చేరాయి, కానీ మొక్కజొన్న దిగుమతులు ఈ డైనమిక్‌ను మార్చవచ్చు. మోదీ ప్రభుత్వం రైతు సంక్షేమాన్ని ప్రాధాన్యంగా పెట్టుకుంటూ, ఈ నిర్ణయాన్ని జాగ్రత్తగా తీసుకుంటుందని అధికారులు క్లారిటీ ఇచ్చారు. ఈ చర్చలు అక్టోబర్-నవంబర్ 2025లో ముగిసేలా కనిపిస్తున్నాయి. సో అప్పుడు ఫైనల్ నిర్ణయం తీసుకునే అవకాశం ఉంది.
మరోవైపు చూస్తే తెలంగాణ, ఆంధ్రప్రదేశ్‌లో మొక్కజొన్న పంటను పెద్ద ఎత్తున పండిస్తున్నారు. తెలంగాణలో 3.5 లక్షల హెక్టార్లలో మొక్కజొన్న సాగు జరుగుతుంది, ఇది రైతుల ఆదాయానికి ప్రధాన మూలం. ఆంధ్రప్రదేశ్‌లో కూడా 2.8 లక్షల హెక్టార్లు మొక్కజొన్న పొలాలు ఉన్నాయి. ఈ రాష్ట్రాల్లో రైతులు సంవత్సరానికి 1 కోటి టన్నులకు పైగా ఉత్పత్తి చేస్తారు. అమెరికా మొక్కజొన్నలు చౌకగా దిగుమతి అయితే, దేశీయ ధరలు 20-30% పడిపోవచ్చు. ఇది రైతులకు భారీ నష్టాన్ని కలిగిస్తుంది.
తెలంగాణలో మొక్కజొన్న రైతులు ఇప్పటికే వర్షాకాల వ్యతిరేకతలు, పెరిగిన ఎరువుల ధరలతో కష్టపడుతున్నారు. ఏపీలో కూడా ఇదే పరిస్థితి. ఈ దిగుమతులు రైతుల జీవనాధారాన్ని కుంటుతాయని వ్యవసాయ సంఘాలు ఆందోళన వ్యక్తం చేస్తున్నాయి. రాష్ట్ర ప్రభుత్వాలు MSP పెంచడం, రైతులకు ఆర్థిక సహాయం అందించడం వంటి చర్యలు తీసుకోవాలని డిమాండ్ చేస్తున్నాయి. ఈ ప్రాంతాల్లో మొక్కజొన్న పంట 60% రైతులకు ఆదాయాన్ని ఇస్తుంది. దిగుమతులు పెరిగితే, రైతులు పంట మార్పిడి చేయవలసి వస్తుంది, ఇది వ్యవసాయ ఆర్థిక వ్యవస్థను దెబ్బతీస్తుంది. Trump Tariffs.
ఈ దిగుమతి నిర్ణయం భారతీయ రైతులకు నష్టం కలిగించవచ్చు. అమెరికా మొక్కజొన్నలు తక్కువ ధరలతో మార్కెట్‌లోకి వస్తే, దేశీయ ఉత్పత్తులకు డిమాండ్ తగ్గుతుంది. ఇది ధరల పతనానికి దారి తీస్తుంది. తెలంగాణ, ఏపీలో రైతులు ఇప్పటికే పెరిగిన ఉత్పత్తి ఖర్చులతో బాధపడుతున్నారు. మొక్కజొన్న ధరలు రూ. 2,000-2,500కు పడిపోతే, రైతులు రూ. 5,000 కోట్ల నష్టాన్ని ఎదుర్కొంటారు. ఇది రైతు ఆత్మహత్యలు, వలసలకు దారి తీస్తుంది. ప్రభుత్వం ఇథనాల్ కోసం దిగుమతి చేస్తున్నప్పటికీ, ఆహార పంటలపై ప్రభావం తప్పదు. వ్యవసాయ నిపుణులు ఈ నిర్ణయం దీర్ఘకాలికంగా భారత వ్యవసాయాన్ని బలహీనపరుస్తుందని హెచ్చరిస్తున్నారు.