Trump on Russia Ukraine War: ఎప్పుడూ తన మాటే వేదమని చెప్పే అమెరికా అధ్యక్షుడు డొనాల్డ్ ట్రంప్ మొదటిసారి తన ఓటమిని అంగీకరించారు. తానే గనుక 2022లో అధ్యక్షుడిగా ఉండుంటే.. అసలు ఉక్రెయిన్ రష్యా యుద్దమే వచ్చేది కాదు ఇవి డొనాల్డ్ ట్రంప్ అమెరికా ఎన్నికలకు ముందు అన్న మాటలు. తాను మళ్లీ గెలిచి, అధ్యక్షుడిని అయితే ఒక్క రోజులోనే ఈ యుద్ధం ఆగిపోతుందని గొప్పలు చెప్పుకున్నారు. కానీ, మాటలు చెప్పినంత ఈజీ కాదనుకున్నారు. ఆ యుద్ధం ఆపలేం అని ఆయన తెలుసుకున్నారు. అయినా, ట్రంప్‌లో ఏదో ఆత్మవిశ్వాసం. ఈ క్రమంలో పుతిన్ దెబ్బకు ఆయన మైండ్ బ్లాంక్ అయ్యింది.
తాను అధికారంలోకి వచ్చిన ఒక్క రోజులోనే ఉక్రెయిన్, రష్యా యుద్ధాన్ని ఆపేస్తానంటూ అమెరికా ఎన్నికల్లో డొనాల్డ్ ట్రంప్ వాగ్దానం చేశారు. అధ్యక్షుడిగా బాధ్యతలు చేపట్టిన తర్వాత యుద్ధం ఆపడానికి ఆయన ప్రయత్నాలు మొదలుపెట్టారు. దాదాపు ఏడు నెలల గడిచిపోయినా ఎక్కడవేసి గొంగళి అక్కడే అన్న చందంగా ఉంది పరిస్థితి. దీంతో ఈ యుద్ధం ఆపడం అంత సులభం కాదని ట్రంప్‌కి ఇప్పటికి తత్వం బోధపడింది. ఇదే విషయాన్ని అమెరికా అధ్యక్షుడు బహిరంగంగా అంగీకరించారు. ప్రస్తుతం యునైటెడ్ కింగ్‌డమ్ (యూకే) పర్యటనలో ఉన్న ట్రంప్.. ఉక్రెయిన్-రష్యా యుద్ధం చాలా సులభంగా పరిష్కరించగలిగేదని అనుకున్నానని.. కానీ తన అభిప్రాయం తప్పని అర్ధమైందని పేర్కొన్నారు. కానీ, తానే ఈ సమస్యను పరిష్కరిస్తానని చెప్పారు. రష్యా అధ్యక్షుడు వ్లాదిమిర్ పుతిన్ తనను నిరాశకు గురిచేశారని చెప్పుకొచ్చారు.
యూకే ప్రధాని కీర్ స్టార్మర్‌తో కలిసి సంయుక్తంగా సమావేశంలో ట్రంప్ పాల్గొన్నారు. ఉక్రెయిన్‌తో యుద్ధం ముగింపు విషయంలో పుతిన్ వ్యవహారం తనను నిరాశకు గురిచేసిందన్నారు. యూకే ప్రధాని సైతం పుతిన్‌పై విమర్శలు గుప్పించారు. దండయాత్ర తర్వాత అతిపెద్ద దాడితో తన నిజస్వరూపాన్ని బయటపెట్టారని దుయ్యబట్టారు. జులైలో అలాస్కా వేదికగా పుతిన్‌తో జరిగిన భేటీలో ఉక్రెయిన్ అధ్యక్షుడు వొలొడిమిర్ జెలెన్‌స్కీతో మాట్లాడాలని ట్రంప్ సూచించారు. కానీ, ఆయన మంత్రాంగం ఫలించలేదు.
దీంతో ‘‘రష్యా-ఉక్రెయిన్ యుద్ధం ఆపడం చాలా సులభమని అనుకున్నాను కానీ పుతిన్ తనని నిరాశకు గురిచేశారన్నారు. ఇజ్రాయెల్-గాజా సమస్య పరిష్కారం కోసం తారె ప్రయత్నిస్తున్నాన్నట్లు తెలుసన్నారు. తాను చాలా సంఘర్షణలను పరిష్కరించాను.. ఇజ్రాయెల్-గాజా సమస్యకు పరిష్కారం లభిస్తుంది.. అలాగే, రష్యా-ఉక్రెయిన్‌లకు కూడా పరిష్కారమవుతుంది.. కానీ, యుద్ధంలో ఏం జరుగుతుందో చెప్పలేం’’ అని ట్రంప్ పేర్కొన్నారు. ‘వాస్తవంగా చెప్పాలంటే ఉక్రెయిన్ కంటే రష్యాకే ఎక్కువ సైనిక నష్టం జరిగింది.. పెద్ద సంఖ్యలో రష్యా సైనికులు ప్రాణాలు కోల్పోయారు’ అని అన్నారు.
‘గత ఏడు నెలల కాలంలో తాను చేసినంతగా ఎవరూ చేయలేదని… ఏడు యుద్ధాలను ఆపా. 31 ఏళ్లుగా కొనసాగుతున్న ఓ ఘర్షణ ముగియడం అసాధ్యమని అంతా అనుకున్నారు. కానీ తాను వెళ్లి రెండు గంటల్లో దాన్ని ముగించా. 35-37 ఏళ్లుగా జరుగుతున్న యుద్ధాలను కూడా ఆపా. రష్యా అధ్యక్షుడు వ్లాదిమిర్ పుతిన్‌తో తనకు ఉన్న స్నేహబంధం కారణంగా మాస్కో-కీవ్‌ యుద్ధాన్ని ముగించడం చాలా సులువైన పని అని భావించా. కానీ అది అంత ఈజీ కాదు. ఆ రెండు దేశాల మధ్య ఘర్షణను ఆపడం అత్యంత కష్టతరంగా మారింది’ అని ట్రంప్ చెప్పారు.
ఇక, ఇటీవలి రోజుల్లో పుతిన్ తన అసలు రూపాన్ని చూపించాడని యూకే ప్రధాని కీర్మర్ పేర్కొన్నారు. అయితే దండయాత్ర ప్రారంభమైనప్పటి నుంచి అతిపెద్ద దాడిని జరిపి, మరింత రక్తపాతం, మరింత మంది అమాయకులు ప్రాణాలు తీశాడని…. అలాగే నాటో గగనతలంపైకి డ్రోన్లు పంపి ఉల్లంఘనలకు పాల్పడ్డాడు’ అని అన్నారు. గతేడాది అమెరికా అధ్యక్ష ఎన్నికల ప్రచారంలో ఉక్రెయిన్-రష్యా యుద్ధాన్ని కూడా ట్రంప్ అస్త్రంగా వాడుకున్నారు. తాను అధ్యక్షుడిగా ఉండుంటే అసలు ఈ యుద్ధమే వచ్చేది కాదని, ఒకవేళ తాను గెలిచి అధికారంలోకి వస్తే ఒక్క రోజులోనే యుద్ధాన్ని ఆపేస్తానని ఉత్తర ప్రగల్భాలు పలికారు. అంతేకాదు, అమెరికా నాయకత్వంపై గౌరవం లేకపోవడంతోనే 2022లో ఉక్రెయిన్‌పై పుతిన్ దండయాత్ర మొదలుపెట్టారని వ్యాఖ్యానించారు. Trump on Russia Ukraine War.
రష్యా-ఉక్రెయిన్ యుద్ధాన్ని ముగించి, శాంతి ఒప్పందం కుదర్చడం కోసం డొనాల్డ్ ట్రంప్ తీవ్రంగా ప్రయత్నిస్తున్నా…అయినప్పటికీ కాల్పుల విరమణకు అధికారిక ఒప్పందం మాత్రం కుదరకపోవడం గమనార్హం.