అమెరికా చదువుపై ఆసక్తి తగ్గుతోందా? భారతీయ విద్యార్థుల చూపు ప్రత్యామ్నాయ దేశాల వైపు..!
అమెరికా ఒకప్పుడు విదేశాలకు వెళ్లి చదువుకోవాలనుకునే వారిలో ఎక్కువమందికి గమ్యస్థానం. అయితే ఇప్పుడు పరిస్థితిలో మార్పు కనిపిస్తోంది. గత కొన్ని సంవత్సరాలుగా అమెరికా వీసాలు పొంది అక్కడికి వెళ్లే భారతీయ విద్యార్థుల సంఖ్యలో స్పష్టమైన తగ్గుదల కనిపిస్తోంది. ఒకప్పుడు ఉన్నత చదువులకు అమెరికానే మొదటి ప్రాధాన్యతగా భావించిన భారతీయ యువత, అక్కడ మారుతున్న పరిణామాలు మరియు విధానాల కారణంగా ప్రస్తుతం పునరాలోచనలో పడుతోంది. అమెరికా ప్రెసిడెంట్‌గా డొనాల్డ్ ట్రంప్ రెండోసారి అధికారంలోకి వచ్చిన తర్వాత వలస విధానాలపై తనదైన శైలిలో కఠిన వైఖరిని అవలంబిస్తున్నారు. దీని ప్రభావం విదేశీ విద్యార్థుల రాకపోకలపై నేరుగా పడింది. కొత్త ప్రభుత్వ విధానాల ఫలితంగా అంతర్జాతీయ విద్యార్థులకు, ముఖ్యంగా భారత్ నుండి వెళ్లే వారికి వీసా ప్రక్రియ మరింత సవాలుగా మారింది. దీనివల్ల గతంలో ఉన్న ఉత్సాహం స్థానంలో విద్యార్థుల్లో అనిశ్చితి వాతావరణం నెలకొంది. తాజాగా వెలువడిన అధికారిక గణాంకాలను పరిశీలిస్తే ఈ పరిస్థితి యొక్క తీవ్రత స్పష్టంగా అర్థమవుతుంది. సాధారణంగా ప్రతీ ఏటా కొత్త విద్యా సంవత్సరం ప్రారంభమయ్యే ఆగస్టు నెలలో అమెరికాకు వెళ్లే విద్యార్థుల రద్దీ ఎక్కువగా ఉంటుంది. అయితే, ఈ ఏడాది ఆగస్టులో భారత్ నుంచి అమెరికా వెళ్లిన విద్యార్థుల సంఖ్య కేవలం 25,321 కి మాత్రమే పరిమితమైంది. ఇది గత ఏడాది నమోదైన సంఖ్యతో పోలిస్తే ఏకంగా 39 శాతం తక్కువ కావడం గమనార్హం.
గత కొన్నేళ్ల క్రితం ఉన్న గణాంకాలతో పోల్చి చూస్తే ఈ పతనం మరింత దారుణంగా కనిపిస్తుంది. 2023 ఆగస్టు నెలలో అంకెతో పోలిస్తే ప్రస్తుత సంఖ్య క్షీణించింది. కోవిడ్ మహమ్మారి తదనంతర కాలంలో భారత్ నుండి అమెరికాకు విద్యార్థుల వెల్లువలో నమోదైన అత్యంత కనిష్ట స్థాయి ఇదే కావడం ఇక్కడి తీవ్రమైన పరిస్థితికి అద్దం పడుతోంది. ఈ తగ్గుదలకు వీసా స్క్రీనింగ్ ప్రక్రియను అత్యంత కఠినతరం చేయడమే ప్రధాన కారణాలలో ఒకటిగా మారింది. గతంలో కంటే భిన్నంగా ఉండడం వీసా ఇంటర్వ్యూలలో కఠినమైన నిబంధనలను అమలు చేయడం, ఈ వీసా రిజెక్షన్ల భయం విద్యార్థులను, వారి తల్లిదండ్రులను తీవ్ర ఆందోళనకు గురిచేస్తోంది. మరోవైపు విద్య పూర్తయిన తర్వాత అమెరికాలోనే ఉండి ఉద్యోగ అనుభవాన్ని సంపాదించుకునేందుకు దోహదపడే ఆప్షనల్ ప్రాక్టికల్ ట్రైనింగ్ (OPT) ప్రోగ్రామ్‌పై భారీ ఫీజులు విధించడం కూడా ప్రతికూల ప్రభావం చూపింది. కోర్సు పూర్తయ్యాక ఉద్యోగం సాధించి తమ విద్యారంగంలో ముందంజ వేయాలనుకునే వారికి ఈ అధిక రుసుములు భారంగా మారాయి. అంతేకాకుండా స్టూడెంట్ వీసాల కాలపరిమితిని గరిష్టంగా కేవలం నాలుగు సంవత్సరాలకే పరిమితం చేయడంతో విద్యార్థుల భవిష్యత్తు ప్రణాళికలు దెబ్బతింటున్నాయి.
దీనికితోడు అమెరికాలో ఎడ్యుకేషన్ ఖర్చు మరియు జీవన వ్యయం గణనీయంగా పెరిగిపోవడం మరో పెద్ద ప్రతిబంధకంగా మారింది. కోర్సు ఫీజులు, వసతి ఖర్చులు నిరంతరం పెరుగుతుండటంతో అంత ఖర్చుపెట్టి చదువుకోవడం ఎంతవరకు సమంజసమనే ప్రశ్న తలెత్తుతోంది. చదువు పూర్తయిన వెంటనే ఉద్యోగం లభిస్తుందనే గ్యారంటీ లేకపోవడం, వీసా నిబంధనల భయం కలగలిసి విద్యార్థులను ఆర్థికంగా తీవ్ర ఒత్తిడికి గురిచేస్తున్నాయి.ఈ అన్ని కారణాల దృష్ట్యా భారతీయ విద్యార్థులు ఇప్పుడు అమెరికాకు ప్రత్యామ్నాయ మార్గాలను అన్వేషిస్తున్నారు. సరళమైన వీసా విధానాలు, నాణ్యమైన విద్య, మంచి ఉద్యోగ అవకాశాలు లభించే కెనడా, బ్రిటన్, జర్మనీ, ఆస్ట్రేలియా వంటి ఇతర అభివృద్ధి చెందిన దేశాల వైపు మొగ్గు చూపుతున్నారు. అమెరికాలోని ప్రస్తుత కఠిన వాతావరణం దృష్ట్యా, వేరే దేశాలలో విద్యను అభ్యసించడమే తమ భవిష్యత్తుకు సురక్షితమని చాలామంది భావిస్తున్నారు.
