వేసవి అంటే చాలామంది మామిడి పండ్ల రుచి కోసం ఎదురుచూస్తుంటారు. పండ్లలో రారాజు అయిన మామిడిలో ఎన్నో రకాలు.. ఎన్నో రుచులు. అయితే చాలామంది పచ్చి మామిడిని కూరలు, పచ్చళ్ల కోసం, పండిన మామిడిని జ్యూసులు, నేరుగా తినడం కోసం మాత్రమే ఉపయోగిస్తారు. కానీ వేసవిలో పచ్చి మామిడిని తినడం వల్ల చాలా హెల్త్ బెనిఫిట్స్ ఉన్నట్లు ఆరోగ్య నిపుణులు చెబుతున్నారు. అవేంటో ఇప్పుడు చూద్దాం:
వేసవికాలంలో చాలామంది వడదెబ్బకు గురవుతుంటారు. అలాంటప్పుడు పచ్చి మామిడి పండును కాస్త ఉడికించి అందులో తగినంత నీరు పోసి మిరియాలు, ఉప్పు లేదా పంచదార వంటివి వేసి కలిపి తాగితే వడదెబ్బ మన దరికి రాదంట. వేసవిలో శరీరం డీహైడ్రేట్ కాకుండా కాపడుతుందట.
పచ్చి మామిడిలో పొటాషియం, ఇతర ఎలక్ట్రోలైట్లు ఉంటాయి. ఇవి వేసవిలో చెమట పట్టడం వల్ల కలిగే ఎలక్ట్రోలైట్ల అసమతుల్యతను భర్తీ చేయడంలో సాయపడుతుంది. సాధారణంగా కొబ్బరి బొండం వంటి పానీయాలలో ఉండే ఎలక్ట్రోలైట్లు పచ్చి మామిడిలోనూ ఉంటాయి. కాబట్టి పచ్చి మామిడిని తరచుగా తీసుకోవడం మేలు.
పచ్చి మామిడిలో ఫైబర్ కంటెంట్ అధికంగా ఉంటుంది. ఇది జీర్ణక్రియను మెరుగుపరచడంలో సహాయపడుతుంది. వేసవిలో జీర్ణసమస్యలు ఎక్కువగా వస్తుంటాయి. అలాంటి వాటికి చెక్ పెట్టేందుకు పచ్చి మామిడి కాయను ఆహారంలో భాగంగా తీసుకోవాలి.
పుల్లగా ఉన్న పండ్లలో విటమిన్-సి సమృద్ధిగా ఉంటుంది. పచ్చి మామిడి కూడా అలాంటి వాటిలో ఒకటి. పచ్చి మామిడిని ఆహారంలో తీసుకుంటే శరీరానికి కావలసిన విటమిన్-సి బాగా దొరుకుతుంది. శరీరంలో వేడి సంబంధిత వ్యాధులతో పోరాడేందుకు ఉపయోగపడటమే కాక రోగనిరోధక శక్తిని కూడా బలపరుస్తుంది.
పచ్చి మామిడి కాయలు ఆల్కలీన్ అనే ఆమ్ల లక్షణాలను కలిగి ఉంటాయి. ఇవి శరీరంలో ఆమ్ల స్థాయిలను సమతుల్యం చేస్తాయి. శరీరంలో యాసిడ్ స్థాయిలను కంట్రోల్ చేస్తాయి.
పచ్చిమామిడి కాయ శరీరానికి చల్లదనాన్ని ఇస్తుంది. ఇది శరీరాన్ని లోపలి నుండి చల్లగా ఉంచుతుంది. పచ్చి మామిడి కాయతో చారు వంటివి కాచుకుని తింటే శరీరానికి చలువ చేస్తుంది. వేసవి వేడి కూడా తగ్గుతుంది.