ఒకే ఒక్కడు..30 ఇయర్స్ ట్రెండ్ సెట్టర్ జర్నీ..కళ్యాణ్ బాబు TO ఏపీ డిప్యూటీ సీఎం

పవన్ సినిమాల్లో ముఖ్యంగా ఆయన వాడిన వస్తువులు, ఆయన డ్రెస్సింగ్ స్టైల్ మార్కెట్లో ట్రెండ్ సెట్టర్‌గా మారాయి. డబుల్ ప్యాంట్స్, గ్యాప్ షర్ట్స్, రాయల్ ఎన్ఫీల్డ్ బైక్, బ్యాగ్ ఇలా ఆయన ఏం చేసినా అప్పట్లో కుర్రకారుకు ఒక ఫ్యాషన్. ఆయన హెయిర్ స్టైల్ కి ఫిదా కాని అమ్మాయి అంటూ ఉండదు. సొంతంగా డ్యాన్స్ కొరియోగ్రఫీ చేసుకోవడం, ఫైట్స్ కంపోజ్ చేసుకోవడం లాంటివి ఆయనకే చెల్లింది. అప్పుడే ఆయనకు అభిమానులు పవర్ స్టార్ అనే బిరుదును అందించారు.

ఖుషి తర్వాత పవన్ కళ్యాణ్ కు ఒక పెద్ద గ్యాప్ వచ్చింది. తాను స్వయంగా డైరెక్ట్ చేసిన జాని డిజాస్టర్ అవ్వడంతో పాటు, ఆ తర్వాత దశాబ్దం పాటు జల్సా మినహా సరైన హిట్ పడలేదు. కానీ ఆయన క్రేజ్ మాత్రం అణువంత కూడా తగ్గలేదు. వరుస పరాజయాలతో ఉన్న పవర్ స్టార్ కు 2012లో హరీష్ శంకర్ ఇచ్చిన బ్లాక్ బస్టర్ గిఫ్ట్ గబ్బర్ సింగ్. ఈ సినిమాతో బాక్సాఫీస్ రికార్డులను బద్దలు కొట్టి సాలిడ్ కంబ్యాక్ ఇచ్చారు పవన్. ఆ తర్వాత త్రివిక్రమ్ శ్రీనివాస్ డైరెక్షన్ లో వచ్చిన అత్తారింటికి దారేది ఇండస్ట్రీ హిట్‌గా నిలిచింది. కంటెంట్ లీక్ అయినా సరే రికార్డులు క్రియేట్ చేయడం ఆయనకే సాధ్యమైంది. పాలిటిక్స్ లోకి వెళ్లిన తర్వాత కాస్త గ్యాప్ ఇచ్చి వకీల్ సాబ్, భీమ్లా నాయక్ సినిమాలతో మళ్లీ ఫ్యాన్స్ కు పూనకాలు తెప్పించారు. పవన్ కళ్యాణ్ కు హిట్లు, ఫ్లాపులతో సంబంధం లేదు. పవన్ కళ్యాణ్ స్క్రీన్ మీద కనిపిస్తే చాలు థియేటర్లలో పండగే అన్నట్లుగా ఆయన ఫ్యాన్ బేస్ తయారైంది. ప్రస్తుతం ఓజీ , ఉస్తాద్ భగత్ సింగ్ లాంటి క్రేజీ ప్రాజెక్ట్స్ ఆయన లైనప్‌లో ఉన్నాయి. సగటు మనిషి పడుతున్న కష్టాలు చూసి, వారి ఆకాంక్షలను అర్థం చేసుకుని, కోపం నుంచి పుట్టిన పార్టీయే జనసేన. 2014లో పార్టీ స్థాపించి, ఎన్నో అవమానాలు, ఓటములను ఎదుర్కొన్న పవన్ కళ్యాణ్ ఏనాడూ వెనక్కి తగ్గలేదు. ప్రజల పక్షాన నిలబడి పోరాడారు. ఆ పోరాటానికి ప్రతిఫలమే 2024 జరిగిన ఏపీ అసెంబ్లీ ఎన్నికల్లో 100 శాతం స్ట్రైక్ రేట్‌తో జనసేన అద్భుత విజయం సాధించడం. పిఠాపురం నుంచి ఎమ్మెల్యేగా గెలిచిన పవన్.. నేడు ఆంధ్రప్రదేశ్ రాష్ట్ర ఉపముఖ్యమంత్రిగా, పంచాయతీరాజ్ , గ్రామీణాభివృద్ధి శాఖ మంత్రిగా బాధ్యతలు నిర్వర్తిస్తున్నారు. సినిమాల్లో పవర్ స్టార్ గా ముప్పై ఏళ్లుగా ప్రేక్షకులను అలరించిన పవన్ కళ్యాణ్.. ఇప్పుడు రియల్ లైఫ్‌లో డిప్యూటీ సీఎంగా ప్రజాసేవలోనూ అదే పవర్ ను చూపిస్తున్నారు.

ఇక ఈ అరుదైన సందర్భాన్ని పురస్కరించుకుని, పవన్ కళ్యాణ్ ఫస్ట్ మూవీని గీతా ఆర్ట్స్ బ్యానర్‌పై నిర్మించిన లెజెండరీ ప్రొడ్యూసర్ అల్లు అరవింద్ ఒక ఎమోషనల్ నోట్‌ను రిలీజ్ చేశారు. డియర్ పవన్ కల్యాణ్, మనిద్దరం కలిసి చేసిన మొదటి సినిమా విడుదలై 30 ఏళ్లు దాటిందంటే నేను నమ్మలేకపోతున్నాను. ఇది వినగానే ఆశ్చర్యంతో పాటు తీవ్రమైన షాక్‌కు గురయ్యాను. ఇండస్ట్రీలో నీ ప్రయాణం ఎవరికీ సాధ్యంకాని రీతిలో తిరుగులేనిదిగా నిలిచింది. సమాజానికి నీవు చేస్తున్న సేవలు, నీ విజన్ నన్ను ఎంతగానో ఆకట్టుకున్నాయి. నీవు ఎంచుకునే ప్రతి బాటలోనూ మరిన్ని మహత్తర విజయాలు సాధించాలని మనస్పూర్తిగా కోరుకుంటున్నాను అని అల్లు అరవింద్ నోట్ పోస్ట్ చేశారు.