వేసవి.. అందులోనూ వాతావరణంలో వస్తున్న మార్పులతో.. అనేక ఆరోగ్య సమస్యలూ వస్తున్నాయి. చాలామందిలో ఈ ఎండలకు శరీరంలో వేడి చేయడం వల్ల వాంతులు, వికారం, తలనొప్పి, అజీర్ణం వంటి సమస్యలు తలెత్తున్నాయి. ఇలాంటి సమయంలో కొన్ని ఆహారపదార్థాలు.. వేసవి వేడికి విరుగుడుగా పనిచేస్తాయి. వీటిని క్రమం తప్పకుండా తీసుకుంటే చాలు.. మీ కడుపును చల్లగా ఉంచుతాయి.
కడుపులో వేడికి కారణాలు:
మన ఫుడ్ హ్యాబిట్స్.. వేసవిలో కడుపులో వేడిని పెంచేస్తాయి. కొన్ని వంటల్లో కారం ఎక్కువగా వాడటం, మాంసాహారం, ధూమపానంతోపాటు టీ, కాఫీలు అతిగా తీసుకోవడం, సరైన టైంలో తినకపోవడంతోపాటు కొన్ని రకాల మందులు కూడా కడుపులో వేడి పెరగడానికి కారణమవుతాయి.
నివారణ:
వేసవిలో ఆహారపు అలవాట్ల విషయంలో చాలా జాగ్రత్త వహించాలి. ఈ సీజన్‌లో తేలికగా జీర్ణమయ్యే ఆహారాన్ని మాత్రమే ప్రిఫర్ చేయాలి. నూనెలో వేయించినవి, కారంగా ఉండే ఆహార పదార్థాలను దాదాపు తగ్గించాలి. పూర్తిగా మానేస్తే ఇంకా మంచిది.
ఉదయం ఖాళీ కడుపుతోనే గోరువెచ్చని నీరు తాగాలి. నిద్రలేచిన 1- 2 గంటల్లోపే అల్పాహారం తీసుకోవాలి. ఎక్కువసేపు ఖాళీ కడుపుతో ఉండకూడదు. ఇక రోజంతా నీరు తాగుతూనే ఉండాలి.
ఆహార మార్పులు..
- వేసవిలో పుష్కలంగా లభించే తాజా పుదీనాను ఆహారంలో భాగం చేసుకోవాలి. పుదీన నీళ్లు తాగినప్పుడు.. కడుపులో యాసిడ్ ఇట్టే తగ్గిపోతుంది.
- బ్రష్‌ చేసిన వెంటనే.. రెండుమూడు తులసి ఆకులను నమిలి మింగేయాలి. ఖాళీ కడుపుతో తులసి ఆకులను నమలడం వల్ల కడుపులో నీటి పరిమాణం పెరుగుతుంది. కడుపులో ఆమ్లాన్ని సైతం తగ్గిస్తుంది. తులసి ఆకులతో టీ చేసుకొని తాగినా మంచి రిజల్ట్ కనిపిస్తోంది.
- కడుపును చల్లగా ఉంచడంలోనూ, వేడిని తగ్గించడంలో సోంపు బెటర్ గా పనిచేస్తుంది. భోజనం తర్వాత కాస్త సోంపు నమిలితే.. కడుపులో చికాకు తగ్గుతుంది. సోంపు నేరుగా తినలేకపోయినా.. సోంపు వాటర్ ని కూడా తాగవచ్చు.
- వేసవిలో ప్రతిరోజూ ఒక అరటిపండు తినాలి. వీటిలో అధిక మొత్తంలో లభించే పొటాషియం.. కడుపులో ఆమ్లాన్ని నియంత్రించడంలో సాయం చేస్తుంది. వేడి నుంచి ఉపశమనం కలిగిస్తుంది.
- వేసవిలో వేడి పాలు నచ్చకుంటే.. చల్లని పాలే తాగాలి. అల్పాహారంగా ప్రతిరోజూ ఒక కప్పు చల్లని పాలు తాగితే.. ఆరోగ్యానికి భరోసా దక్కుతుంది. ఇందులోని కాల్షియం.. కడుపు వేడిని తగ్గిస్తుంది. చల్లదనాన్ని అందిస్తుంది.