ఆ పౌరుల డిపోర్ట్ అంశంలో అమెరికాకు భారీ షాకిచ్చిన పాకిస్థాన్..!
అమెరికాలో అక్రమ వలసదారులను డిపోర్ట్ చేయడం డొనాల్డ్ ట్రంప్ అడ్మినిస్ట్రేషన్‌లో అత్యంత కీలకాంశం. ఎవరైతే సరైన పత్రాలు లేకుండా అమెరికాలో ఉంటున్నారో, వారిని వెంటనే పట్టుకుని వారి సొంత దేశాలకు పంపించి వేసేందుకు అమెరికా ప్రభుత్వం చాలా సీరియస్‌గా అడుగులు వేస్తోంది. అయితే అన్ని దేశాల వారిని పంపించినట్లు ఇరాన్, ఆఫ్ఘనిస్థాన్ పౌరులను పంపించడం కుదరదు. ఎందుకంటే, ఇరాన్ తో అమెరికాకు ఎలాంటి దౌత్య సంబంధాలు లేవు. డైరెక్ట్‌గా అమెరికా విమానాలు ఇరాన్‌లో ల్యాండ్ కాలేవు. ఇక ఆఫ్ఘనిస్థాన్ పరిస్థితి చూసుకుంటే.. అక్కడ తాలిబన్ల రాజ్యం నడుస్తోంది. దీంతో ఈ రెండు దేశాలకు చెందిన వలసదారులను స్వదేశాలకు పంపించడానికి ట్రంప్ ప్రభుత్వం ఒక కొత్త మాస్టర్ ప్లాన్ వేసింది. వారిని పంపేదుకు పాకిస్థాన్‌ను ఒక మధ్యంతర రవాణా కేంద్రంగా వాడుకోవడం. అమెరికా నుంచి విమానాలను పాకిస్థాన్‌కు పంపి, అక్కడి నుంచి రోడ్డు మార్గం ద్వారా లేదా ఇతర మార్గాల ద్వారా ఇరాన్, ఆఫ్ఘన్‌లకు వలసదారులను పంపాలన్నది అమెరికా వ్యూహం. కానీ, ట్రంప్ వేసిన ఈ వ్యూహానికి పాకిస్థాన్ అనూహ్యంగా బ్రేక్ వేసింది. అమెరికాకు ఒక భారీ షాక్ ఇచ్చింది.
ఈ నవంబర్ 10న అమెరికాలోని అరిజోనా రాష్ట్రం, మెసా ఎయిర్‌పోర్ట్ నుంచి ఒక భారీ డిపోర్టేషన్ విమానం బయలుదేరింది. అందులో తొమ్మిది మంది ఇరాన్ పౌరులు ఉన్నట్లు న్యూయార్క్ టైమ్స్ పత్రిక వెల్లడించింది. వీరిని పాకిస్థాన్‌లో దించి, అక్కడి నుంచి ఇరాన్ పంపాలన్నది ప్లాన్. అయితే ఆ విమానం గాల్లోకి ఎగిరిన సరిగ్గా 30 నిమిషాల్లోనే యూ-టర్న్ తీసుకుని తిరిగి అదే అరిజోనా విమానాశ్రయానికి చేరుకుంది. ఆ ప్రయాణికులను తమ దేశంలోకి స్వీకరించేందుకు పాకిస్థాన్ నిరాకరించడమే ఇందుకు కారణం. పాకిస్థాన్ నుంచి క్లియరెన్స్ రాకపోవడంతో అమెరికా అధికారులు విమానాన్ని వెనక్కి రప్పించారు. ఇది ఒక్కరోజు జరిగిన సంఘటన కాదు. కేవలం మూడు రోజుల వ్యవధిలో అమెరికాకు ఎదురైన రెండో విఫల ప్రయత్నం ఇది. అంతకుముందు నవంబర్ 8న కూడా ఇలాగే ఎనిమిది మంది ఇరానీయులను పాకిస్థాన్ మీదుగా పంపించే ప్రయత్నం చేశారు, కానీ అది కూడా చివరి నిమిషంలో క్యాన్సెల్ అయ్యింది.
కేవలం ఇరాన్ పౌరులు మాత్రమే కాదు, అమెరికాలో ప్రస్తుతం ఉంటున్న దాదాపు 150 నుంచి 200 మంది ఆఫ్ఘన్‌ పౌరులను కూడా పాకిస్థాన్ మీదుగా తాలిబన్ల పాలనలోని ఆఫ్ఘనిస్థాన్‌కు పంపించాలని ట్రంప్ అడ్మినిస్ట్రేషన్ ప్లాన్ చేసింది. అయితే ఇప్పుడు అమెరికా డిపోర్ట్ చేయాలనుకుంటున్న ఈ 200 మంది ఆఫ్ఘన్లలో.. గతంలో ఆఫ్ఘనిస్థాన్‌లో అమెరికా సైన్యం ఉన్నప్పుడు వారికి ఇంటర్‌ప్రెటర్లుగా, గైడ్‌లుగా సహకరించినవారు చాలామంది ఉన్నారు. తాలిబన్లకు వ్యతిరేకంగా అమెరికా చేసిన యుద్ధంలో వీరు కీలక పాత్ర పోషించారు. ఇప్పుడు అలాంటి వాళ్లను పట్టుకుని మళ్లీ ఆఫ్ఘనిస్థాన్‌కు పంపిస్తే వారి ప్రాణాలకే ముప్పు వాటిల్లే అవకాశం ఉందని అమెరికా వారిని డిపోర్ట్ చేయాలనుకోవడంపై తీవ్ర ఆందోళనలు వ్యక్తమయ్యాయి. అమెరికా సైన్యానికి సాయం చేసిన వారిని మృత్యుఒడిలోకి ఎలా నెడతారంటూ హ్యూమన్ రైట్స్ యాక్టివిస్టులు కోర్టును ఆశ్రయించారు. ఈ ప్రయత్నాన్ని సవాల్‌ చేస్తూ పిటిషన్లు దాఖలు కావడంతో, నవంబర్ 3న అమెరికా న్యాయస్థానం ఆఫ్ఘన్ల డిపోర్టేషన్‌ను తాత్కాలికంగా నిలిపివేసింది. ఈ మొత్తం ఎపిసోడ్‌లో పాకిస్థాన్ ఆడుతున్న డబుల్ గేమ్ ఇప్పుడు ఇంటర్నేషనల్ మీడియాలో చర్చకు దారితీసింది. వలసదారులను తమ దేశం మీదుగా పంపించే అంశంపై అమెరికా అధికారులతో ప్రతిపాదనలు, చర్చలు జరిగినట్లు పాకిస్థాన్ అంగీకరించింది. అయితే అమెరికాతో ఎలాంటి తుది ఒప్పందం చేసుకోలేదని పాక్ స్పష్టం చేసింది. కానీ అమెరికా అధికారులు మాత్రం కోర్టులో వేరే వాదన వినిపిస్తున్నారు. ఇరాన్ వలసదారులకు పాకిస్థాన్ ఇప్పటికే 15 రోజుల ట్రాన్సిట్‌ వీసాలు కూడా జారీ చేసిందని, అన్నీ పక్కాగా మాట్లాడిన తర్వాతే విమానాలు ఎక్కించామని అమెరికా కోర్టు పత్రాల్లో ప్రస్తావించింది. కానీ దీనిపై పాక్ ప్రభుత్వం నుంచి ఎలాంటి స్పష్టత లేదు. అమెరికా ప్రతిపాదనకు భవిష్యత్తులో పాకిస్థాన్ పూర్తిస్థాయిలో అంగీకరిస్తుందా? లేదా అమెరికా కాంగ్రెస్ ఆంక్షలకు భయపడి దూరంగా ఉంటుందా అన్నది చూడాలి. మరి పాకిస్థాన్ సహకరించకపోతే, ఇరాన్, ఆఫ్ఘన్‌ వలసదారుల తరలింపు కోసం ట్రంప్ ప్రభుత్వం మరో దేశాన్ని ఆశ్రయిస్తుందా? అన్నది ఆసక్తికరంగా మారింది.
