డ్రగ్స్ మహమ్మారిపై యుద్ధం..కదం తొక్కుతున్న సినీ, రాజకీయ ప్రముఖులు

నేటి యువత బంగారు భవిష్యత్తును, ఎన్నో కుటుంబాల సంతోషాలను చిదిమేస్తున్న అతిపెద్ద మహమ్మారి డ్రగ్స్ . ఈ మత్తుపదార్థాల రక్కసిని సమాజం నుంచి శాశ్వతంగా తరిమికొట్టేందుకు ఇప్పుడు సినీ, రాజకీయ రంగాలు కదంతొక్కుతున్నాయి. హైదరాబాద్ మహానగరంలో డ్రగ్స్ మహమ్మారికి వ్యతిరేకంగా ప్రజల్లో చైతన్యం తీసుకురావడానికి కేంద్ర మంత్రి కిషన్ రెడ్డి భారీ స్థాయిలో నషా ముక్త్ భారత్ యాత్ర కు శ్రీకారం చుట్టారు. ఈ నెల 25, 26, 27 తేదీల్లో మూడు రోజుల పాటు జరిగే ఈ మహా ప్రజా ఉద్యమంలో సమాజంలోని అన్ని వర్గాలను భాగస్వాములను చేసే ప్రయత్నంలో భాగంగా, కిషన్ రెడ్డి ప్రముఖ సినీ నటుడు అక్కినేని నాగార్జునను ప్రత్యేకంగా ఆహ్వానించారు. ఈ ఆహ్వానాన్ని ఎంతో సాదరంగా స్వీకరించిన కింగ్ నాగార్జున, యాత్రకు తన సంపూర్ణ మద్దతును ప్రకటించారు. ఈ సందర్భంగా నాగార్జున, కిషన్ రెడ్డి కలిసి యాత్రకు సంబంధించిన ప్రత్యేక టీ-షర్టులను ఆవిష్కరించారు. ఒక స్టార్ హీరో ఇలాంటి సామాజిక ఉద్యమానికి ముందుకు రావడం వల్ల లక్షలాది మంది యువతలో, అభిమానుల్లో డ్రగ్స్పై అవగాహన పెరుగుతుందని పలువురు ప్రశంసిస్తున్నారు.
ఈ సందర్భంగా అక్కినేని నాగార్జున చేసిన వ్యాఖ్యలు ప్రతి ఒక్కరినీ ఆలోచింపజేసేలా ఉన్నాయి. సమాజాన్ని, ముఖ్యంగా దేశానికి వెన్నెముక లాంటి యువత జీవితాలను నాశనం చేస్తున్న డ్రగ్స్ రక్కసిని అంతమొందించడం మనందరి సామాజిక బాధ్యత అని ఆయన స్పష్టం చేశారు. కేవలం ప్రభుత్వం లేదా పోలీసులు మాత్రమే కాదు, ప్రతి పౌరుడు ఈ పోరాటంలో భాగస్వామి కావాలని నాగార్జున అభిప్రాయపడ్డారు. ఆరోగ్యకరమైన, డ్రగ్స్ రహిత సమాజ నిర్మాణం కోసం జరిగే ఇలాంటి గొప్ప కార్యక్రమాలకు తన మద్దతు ఎల్లప్పుడూ ఉంటుందని ఆయన హామీ ఇచ్చారు. సినీ రంగం నుంచి నాగార్జున వంటి సీనియర్ హీరో ఇలాంటి బలమైన సందేశం ఇవ్వడం నిజంగా హర్షించదగ్గ విషయం. ఈ యాత్ర వెనుక ఉన్న జాతీయ లక్ష్యాన్ని కేంద్ర మంత్రి కిషన్ రెడ్డి స్పష్టంగా వివరించారు. ప్రధానమంత్రి నరేంద్ర మోదీ ఇచ్చిన ‘నషా ముక్త్ యువా ఫర్ వికసిత్’ భారత్ పిలుపు మేరకు, అలాగే 2029 నాటికి డ్రగ్స్ రహిత భారతదేశాన్ని నిర్మించాలన్న కేంద్ర హోంమంత్రి అమిత్ షా దృఢ సంకల్పంతో ఈ యాత్రను చేపడుతున్నట్లు ఆయన తెలిపారు. భావితరాల భద్రత కోసం నిర్వహిస్తున్న ఈ మహత్తర కార్యక్రమంలో కేవలం రాజకీయ నాయకులు మాత్రమే కాకుండా.. యువత, తల్లిదండ్రులు, విద్యార్థులు, నగర ప్రజలు ప్రతి ఒక్కరూ స్వచ్ఛందంగా భాగస్వాములు కావాలని కిషన్ రెడ్డి పిలుపునిచ్చారు. ఈ నెల 25, 26, 27 తేదీల్లో జరిగే ఈ హైదరాబాద్ వాక్ ఒక చారిత్రక ఉద్యమంగా నిలవబోతోంది. రాజకీయాలకు అతీతంగా, సినీ, సామాజిక రంగాలన్నీ కలిసి చేస్తున్న ఈ నషా ముక్త్ భారత్ యాత్రను మనమందరం సపోర్ట్ చేయాల్సిన అవసరం ఉందనే అభిప్రాయం వ్యక్తమవుతోంది.



