పాలిటిక్స్ లోకి నయనతార అంటూ వార్తలు?..క్లారిటీ ఇచ్చిన విఘ్నేశ్ శివన్

తమిళనాట రాజకీయాలు అంటేనే సినిమా..సినిమా అంటేనే రాజకీయాలు. వెండితెర మీద డైలాగులు చెప్పిన ఎంతోమంది హీరోలు, అక్కడ ముఖ్యమంత్రి పీఠాన్ని అధిష్టించారు. ఎంజీఆర్, కరుణానిధి నుంచి మొదలుపెడితే జయలలిత, విజయకాంత్, కమల్ హాసన్.. ఇటీవల జరిగిన అసెంబ్లీ ఎన్నికల్లో కొత్తగా పార్టీ పెట్టి పొలిటికల్ ఎంట్రీ ఇచ్చి సీఎంగా ఎదిగిన దళపతి విజయ్ వరకు. ఈ జాబితా చాలా పెద్దదే. ఇప్పుడు ఒక హీరోయిన్ పొలిటికల్ ఎంట్రీ గురించి కోలీవుడ్‌లో హాట్ డిబేట్ నడుస్తోంది. రెండు దశాబ్దాలుగా సౌత్ ఇండియాలో లేడీ సూపర్ స్టార్‌గా ఒక వెలుగు వెలుగుతున్న హీరోయిన్ నయనతార. ఇప్పుడు ఈమె తమిళనాడు రాజకీయాల్లోకి ఎంట్రీ ఇవ్వబోతోందంటూ సోషల్ మీడియాలోవార్తలు తెగ వైరల్ అవుతున్నాయి. తనకంటూ ఒక సెపరేట్ మార్కెట్ క్రియేట్ చేసుకుని, హీరోలతో సమానంగా రెమ్యునరేషన్ తీసుకుంటున్న ఏకైక నటి నయనతార. లేడీ ఓరియెంటెడ్ సినిమాలతో వందల కోట్లు కలెక్ట్ చేసిన రికార్డ్ ఆమె సొంతం. జవాన్ సినిమాతో ఏకంగా బాలీవుడ్‌ను కూడా షేక్ చేసింది. అయితే, ఇటీవల నయనతార తీసుకుంటున్న కొన్ని నిర్ణయాలు ఆమె రాజకీయ ప్రవేశానికి సంకేతాలుగా మారుతున్నాయని విశ్లేషకులు అంటున్నారు. ఒకప్పుడు కేవలం సినిమాలకే పరిమితమైన నయన్, ఇప్పుడు పబ్లిక్ ఇవెంట్స్‌లో ఎక్కువగా పాల్గొంటున్నారు. సామాజిక సేవా కార్యక్రమాల్లో చురుకుగా ఉంటున్నారు. రైతుల సమస్యలపైన, మహిళా సాధికారత పైన ఆమె గతంలో చేసిన సినిమాలు అరమ్, కోలమావు కోకిల ప్రజల్లో ఆమెకు ఒక నాయకురాలి ఇమేజ్‌ను క్రియేట్ చేశాయి. ముఖ్యంగా కర్తవ్యం సినిమాలో కలెక్టర్‌గా ఆమె నటన చూసి అప్పట్లోనే ఈమె పాలిటిక్స్‌లోకి వస్తే బాగుంటుందని చాలా మంది తమిళ ప్రజలు అనుకున్నారు. ఇప్పుడు ఆ పుకార్లే మళ్లీ తమిళనాట ఊపందుకున్నాయి.

తమిళ రాజకీయాల్లో నయనతార పేరు ఇంతలా ఎందుకు వినిపిస్తోందో తెలుసా? దానికి ఒక బలమైన కారణం ఉంది. అదే అమ్మగా సుదీర్ఘకాలంపాటు తమిళ రాజకీయాలను శాసించిన జయలలిత. ఆమె మరణం తర్వాత తమిళనాడు రాజకీయాల్లో ఒక పవర్‌ఫుల్ మహిళా నాయకురాలి లోటు స్పష్టంగా కనిపిస్తోంది. ఎంతమంది మగ నాయకులు ఉన్నా, ప్రజలను తన కనుసైగలతో శాసించగల ఒక కరిష్మా ఉన్న లేడీ లీడర్ కోసం తమిళ ప్రజలు ఎదురుచూస్తున్నారు. సరిగ్గా ఇక్కడే నయనతార పేరు తెరపైకి వచ్చింది. జయలలిత కూడా నటిగా కెరీర్ స్టార్ట్ చేసి, ఆ తర్వాత రాజకీయాల్లోకి వచ్చి సీఎంగా చరిత్ర సృష్టించారు. ఇప్పుడున్న పరిస్థితుల్లో, తమిళనాడులో జయలలిత అంతటి గ్లామర్, ఫాలోయింగ్, చరిష్మా ఉన్న ఏకైక మహిళా సెలబ్రిటీ నయనతార మాత్రమే. ఆమెకు ఉన్న ఫ్యాన్ బేస్, మహిళల్లో ఉన్న ఆదరణ చూస్తుంటే, ఒకవేళ ఆమె రాజకీయాల్లోకి వస్తే కచ్చితంగా ఆ లోటును భర్తీ చేయగలరని పొలిటికల్ పండితులు అంచనా వేస్తున్నారు. ఇక ఈ పొలిటికల్ ఎంట్రీ వార్తల వెనుక నయనతార భర్త, దర్శకుడు విఘ్నేష్ శివన్ పాత్ర చాలా ఉందని గుసగుసలు వినిపిస్తున్నాయి. విఘ్నేష్ శివన్ కేవలం డైరెక్టర్ మాత్రమే కాదు, ఒక అద్భుతమైన స్ట్రాటజిస్ట్. వాళ్ల సొంత ప్రొడక్షన్ హౌస్ రౌడీ పిక్చర్స్ ద్వారా సమాజానికి ఉపయోగపడే మంచి మెసేజ్ ఉన్న సినిమాలను ప్రొడ్యూస్ చేస్తున్నారు. అయితే

నయనతార రాజకీయాల్లోకి వస్తున్నారంటూ వస్తున్న వార్తలపై ఆమె భర్త, దర్శకుడు విఘ్నేశ్ శివన్ క్లారిటీ ఇచ్చారు. నయనతార ప్రస్తుతం రాజకీయాల్లోకి వచ్చే ఆలోచనలో లేరని విఘ్నేశ్ శివన్ చెప్పారు. ఆమె ప్రస్తుతం పూర్తి సమయాన్ని పిల్లలు, కుటుంబం మరియు సినిమాలకే కేటాయిస్తున్నారని పేర్కొన్నారు. 2031 తమిళనాడు అసెంబ్లీ ఎన్నికల నాటికి నయనతార రాజకీయ అరంగేట్రం చేస్తారని ఇటీవల జోరుగా ప్రచారం జరిగిన నేపథ్యంలో ఆయన ఇచ్చిన ఈ క్లారిటీతో ఆ వార్తలకు చెక్ పెట్టినట్లయింది. నయనతార ప్రస్తుతం పలు భారీ చిత్రాలతో బిజీగా ఉన్నారు.