వివాదంలో కరీనా కపూర్ మెడలోని 200 ఏళ్ల నాటి పచ్చల హారం.. అసలు ఆ లాకెట్ లో ఏముంది?
ఇటీవల జరిగిన దీపావళి వేడుకల్లో కరీనా కపూర్ ఒక అద్భుతమైన ట్రెడిషనల్ లుక్‌లో మెరిసిపోయింది. ఆ ఫొటోలు ఇంటర్నెట్‌లో క్షణాల్లో వైరల్ అయ్యాయి. కానీ, ఆ ఫొటోలే ఇప్పుడు ఆమె మెడకు ఒక పెద్ద లీగల్ ఉచ్చు బిగించాయి. దీపావళి పండగ రోజు కరీనా కపూర్ తన మెడలో ధరించిన ఒక భారీ పచ్చల హారం ఇప్పుడు దేశవ్యాప్తంగా ఒక పెద్ద మత వివాదానికి దారితీసింది. ఆ లాకెట్ మీద పవిత్ర ఖురాన్‌లోని వచనాలు చెక్కి ఉండటంతో ఒక వర్గం తీవ్రంగా అభ్యంతరం వ్యక్తం చేస్తోంది. ఏకంగా ఆమెకు, ఆమె స్టైలిస్ట్‌కు ఒక లీగల్ నోటీసు కూడా పంపించారు. వెంటనే ఆమె పబ్లిక్‌గా క్షమాపణలు చెప్పాలని, ఆ ఫొటోలను సోషల్ మీడియా నుంచి డిలీట్ చేయాలని వార్నింగ్ ఇచ్చారు.
ప్రముఖ డిజైనర్ పునీత్ బలానా డిజైన్ చేసిన ప్యూర్ సిల్వర్ కాఫ్తాన్ , దానికి మ్యాచింగ్ తలపాగాలో కరీనా ఎంతో రాయల్‌గా కనిపించింది. ఆమె లుక్‌ను డిజైన్ చేసిన ప్రముఖ సెలబ్రిటీ స్టైలిస్ట్ రియా కపూర్ , తన ఇన్‌స్టాగ్రామ్‌లో ఆ ఆభరణాల గురించి ఒక పోస్ట్ పెట్టడంతోనే ఈ వివాదం మొదలైంది. ఇది నిజమైన రాయల్ స్టైల్. కరీనా ధరించిన ఈ ఆభరణాలు సుమారు 200 ఏళ్ల నాటివి. ఆమె తలకు పెట్టుకున్న కల్గీ , భోపాల్ నవాబుల కాలం నాటిది. ఇక ఆమె మెడలో ఉన్నది 30 క్యారెట్ల పచ్చల లాకెట్ . ఇది భోపాల్ బేగంకు చెందినది, ఆ పచ్చ మీద ఆయత్-ఉల్-కుర్సీ చెక్కి ఉంది అని రాసుకొచ్చారు. ఇవి మార్కెట్‌లో కొన్నవి కావు, ఇవన్నీ సైఫ్ అలీ ఖాన్ కుటుంబం నుంచి వచ్చిన వారసత్వ సంపద . సైఫ్ నాయనమ్మ, అంటే భోపాల్ చివరి నవాబు హమీదుల్లా ఖాన్ కూతురు సాజిదా సుల్తాన్‌కు చెందిన ఆస్తులివి అని చెప్పుకొచ్చింది..ఇక ఆ పోస్ట్‌లో ఖురాన్ వచనాలు అన్న పదం చూడగానే ఈ వివాదం రాజుకుంది.
పవిత్ర ఖురాన్‌లోని సూరా అల్-బఖరాలోని 255వ వచనాన్ని ఆయత్-ఉల్-కుర్సీ అంటారు. ఇది అల్లాహ్ .. శక్తిని, జ్ఞానాన్ని, ఆయన సర్వాంతర్యామి అన్న విషయాన్ని వివరిస్తుంది. ఇస్లాం మతంలో ఈ వచనాలకు అత్యంత పవిత్రమైన స్థానం ఉంది. అందుకే ఇలాంటి పవిత్రమైన వచనాలను కేవలం ఒక ఫ్యాషన్ యాక్సెసరీగా ఒక సినిమా హీరోయిన్ వాడుకోవడంపై ముస్లిం సమాజం నుంచి అభ్యంతరాలు మొదలయ్యాయి. దీనిపై భోపాల్‌కు చెందిన కాంగ్రెస్ నేత, సామాజిక కార్యకర్త అబ్బాస్ హఫీజ్ తీవ్రంగా స్పందించారు. ఆయన తన వ్యక్తిగత హోదాలో, ముస్లిం సమాజం తరఫున కరీనా కపూర్‌కు, స్టైలిస్ట్ రియా కపూర్‌కు ఒక లీగల్ నోటీసు పంపించారు. కరీనా ధరించిన డ్రెస్ మీద కానీ, ఆమె వ్యక్తిగత ఫ్యాషన్ మీద కానీ తనకు ఎలాంటి అభ్యంతరం లేదని.. కేవలం ఆ పవిత్రమైన ఆయత్-ఉల్-కుర్సీ చెక్కి ఉన్న లాకెట్‌ను అలా దీపావళి పార్టీలో ప్రదర్శించడం మీదే తన అభ్యంతరం అని ఆయన స్పష్టం చేశారు. ఒక మత గ్రంథంలోని పవిత్ర వచనాలను పండుగ వేడుకల్లో కేవలం ఒక అలంకారప్రాయంగా వాడుకోవడం ఇస్లామిక్ స్కాలర్స్ కూడా వ్యతిరేకిస్తున్నారని ఆయన గుర్తుచేశారు.
ఈ లీగల్ నోటీసులో ప్రధానంగా మూడు డిమాండ్లు ఉన్నాయి. మొదటిది, ఆ ఖురాన్ వచనాలున్న లాకెట్ కనిపిస్తున్న ఫొటోలను, వీడియోలను తక్షణమే అన్ని సోషల్ మీడియా ప్లాట్‌ఫామ్స్ నుంచి కరీనా, రియా కపూర్ డిలీట్ చేయాలి. రెండవది, ఆ పవిత్ర వచనాల పట్ల వ్యవహరించిన తీరుకు ముస్లిం సమాజానికి బేషరతుగా బహిరంగ క్షమాపణ చెప్పాలి. మూడవది, భవిష్యత్తులో ఆ పవిత్ర వచనాలను దాని మతపరమైన పవిత్రతకు భంగం కలిగేలా ఎప్పుడూ ప్రదర్శించబోమని లిఖితపూర్వకంగా హామీ ఇవ్వాలి. ఒకప్పుడు భోపాల్ బేగమ్‌లు షాజహాన్ బేగం, సుల్తాన్ జహాన్ బేగమ్‌లు తమ మత విశ్వాసానికి ప్రతీకగా ఆ ఆయత్-ఉల్-కుర్సీ లాకెట్‌ను తయారు చేయించుకున్నారని, అంతేకానీ అది పార్టీల్లో వేసుకునే ఫ్యాషన్ వస్తువు కాదని అబ్బాస్ హఫీజ్ ఆ నోటీసులో పేర్కొన్నారు. ఇప్పుడు ఈ వివాదం రెండు కోణాల్లో నడుస్తోంది. ఒక వర్గం ఏమో ఇది పక్కాగా మతపరమైన అంశమని, పవిత్ర వచనాలను అలా పార్టీల్లో ప్రదర్శించడం తప్పని వాదిస్తోంది. మరో వర్గం ఏమో.. అది వారి కుటుంబం నుంచి వచ్చిన వారసత్వ సంపద . తన భర్త కుటుంబానికి చెందిన వస్తువును ఒక కోడలిగా ఆమె గౌరవంగా ధరించింది, అందులో వివాదం ఎందుకు వెతుకుతున్నారని కరీనా ఫ్యాన్స్ సపోర్ట్ చేస్తున్నారు. ఇదే సమయంలో కరీనా కపూర్‌కు భోపాల్‌కు చెందిన హిందూ ఉత్సవ్ సమితి బాసటగా నిలిచింది. కరీనా కపూర్ ఎవరికీ క్షమాపణలు చెప్పాల్సిన అవసరం లేదని వారు స్పష్టం చేస్తున్నారు. తమ కుటుంబ ఆస్తిని, ఆభరణాలను ఎలా ధరించాలో అది కరీనా కపూర్ వ్యక్తిగత ఇష్టమని, దీనికి మత రంగు పులమడం కరెక్ట్ కాదని వారు వాదిస్తున్నారు. కావాలనే కొందరు పబ్లిసిటీ కోసం ఈ వివాదాన్ని రాజేస్తున్నారని వారు ఆరోపిస్తున్నారు. దీంతో ఈ వ్యవహారం ఇప్పుడు వారసత్వ సంపద వర్సెస్ మత విశ్వాసం అన్నట్లుగా సోషల్ మీడియాలో పెద్ద డిబేట్‌కు దారితీసింది.సైఫ్ అలీ ఖాన్ ఫ్యామిలీ ఈ వివాదాన్ని ఎలా హ్యాండిల్ చేస్తుందో చూడాలి.
