పౌల్ట్రీ రైతులకు గుడ్ న్యూస్..బర్డ్ ఫ్లూ మహమ్మారికి తొలి స్వదేశీ టీకా..!

మన దేశంలో వ్యవసాయం తర్వాత అత్యధిక మందికి ఉపాధి కల్పిస్తున్న రంగం పౌల్ట్రీ . కోళ్ల పెంపకం లక్షలాది కుటుంబాలకు జీవనాధారం. అయితే బర్డ్ ఫ్లూ ఈ రంగాన్ని పట్టిపీడిస్తున్న సమస్యల్లో ఒకటి. ఎక్కడో ఒక ఫారంలో ఒక కోడికి బర్డ్ ఫ్లూ వైరస్ సోకిందని తెలిస్తే చాలు ఆ చుట్టుపక్కల ఉన్న ఫారాల్లోని లక్షలాది కోళ్లను ప్రాణాలతోనే పూడ్చిపెట్టాల్సిన దారుణమైన పరిస్థితి. దీనివల్ల రైతులకు రాత్రికి రాత్రే భారీ నష్టం వస్తుంది. అయితే ఇన్నాళ్లూ ఈ బర్డ్ ఫ్లూ మహమ్మారికి సరైన మందు లేదు, వ్యాక్సిన్ లేదు. కానీ ఇప్పుడు భారత్ మరో చారిత్రక శాస్త్రీయ విజయాన్ని సాధించింది. దేశంలో కోళ్ల పెంపకందారులను తీవ్ర ఆందోళనకు గురిచేస్తున్న ఈ H5N1 బర్డ్ ఫ్లూ వైరస్ కు మన దేశంలోనే మొట్టమొదటి స్వదేశీ వ్యాక్సిన్ను శాస్త్రవేత్తలు అభివృద్ధి చేశారు. అత్యంత ప్రమాదకరమైన బర్డ్ ఫ్లూ వైరస్ను నియంత్రించడమే లక్ష్యంగా భారతీయ సైంటిస్టులు ఎన్నో ఏళ్లుగా పరిశోధనలు చేస్తున్నారు. ఫైనల్ గా భోపాల్లోని భారత వ్యవసాయ పరిశోధనా మండలి పరిధిలో ఉన్న నేషనల్ ఇన్స్టిట్యూట్ ఆఫ్ హై సెక్యూరిటీ యానిమల్ డిసీజెస్ శాస్త్రవేత్తలు మొట్టమొదటి స్వదేశీ టీకాను రూపొందించారు. ఇది H5N1 వైరస్కు చెందిన అత్యంత ప్రమాదకరమైన క్లేడ్ 2.3.2.1a రకానికి వ్యతిరేకంగా పనిచేస్తుంది. ఇదొక ఇనాక్టివేటెడ్ వ్యాక్సిన్ . ప్రస్తుతం మన దేశంలో వ్యాప్తి చెందుతున్న వైరస్ రకాన్ని ప్రత్యేకంగా దృష్టిలో పెట్టుకుని, మన వాతావరణానికి సరిపోయే విధంగా మన శాస్త్రవేత్తలు దీనిని రూపొందించారు. విదేశాల నుంచి వచ్చే వాణిజ్య వ్యాక్సిన్లు మన దేశంలో అందుబాటులో లేకపోవడంతో ఈ స్వదేశీ వ్యాక్సిన్ అభివృద్ధి పౌల్ట్రీ రంగానికి చాలా కీలకమైనది. ఈ అద్భుతమైన వ్యాక్సిన్ను కేంద్ర వ్యవసాయ, రైతు సంక్షేమ శాఖ మంత్రి శివరాజ్ సింగ్ చౌహాన్ నవంబర్ 20న అధికారికంగా దేశానికి అంకితం చేయనున్నారు.
2006లో భారత్లో తొలిసారిగా బర్డ్ ఫ్లూను గుర్తించారు. అప్పటి నుంచి ఇప్పటివరకు H5N1, H5N8 వైరస్ లకు సంబంధించి ఏకంగా 500కు పైగా బర్డ్ ఫ్లూ వ్యాప్తి ఘటనలు నమోదైనట్లు కేంద్ర ప్రభుత్వమే వెల్లడించింది. దీనివల్ల పౌల్ట్రీ రైతులు ఏటా కోట్లాది రూపాయల నష్టాన్ని చవిచూస్తున్నారు. అంతేకాకుండా కోడిగుడ్లు , చికెన్ ఉత్పత్తుల సరఫరా పడిపోయి మార్కెట్ లో ధరలు ఆకాశాన్ని తాకుతాయి. ఇతర దేశాలకు మన చికెన్ ఎగుమతులు కూడా ఆగిపోతాయి. ఇలాంటి నష్టాలకు, రైతుల ఆత్మహత్యలకు ఈ కొత్త స్వదేశీ వ్యాక్సిన్ ఫుల్ స్టాప్ పెట్టబోతోంది.
బర్డ్ ఫ్లూ కేవలం పక్షులకే పరిమితమైన వ్యాధి కాదు. ఇది జూనోటిక్ డిసీజ్ . అంటే ఇన్ఫెక్షన్ ఉన్న పక్షులు లేదా జంతువుల నుంచి మనుషులకు కూడా సోకే అత్యంత ప్రమాదకరమైన వైరస్ ఇది. ప్రపంచ ఆరోగ్య సంస్థ అధికారిక గణాంకాల ప్రకారం.. 2003 నుంచి ప్రపంచవ్యాప్తంగా పలు దేశాల్లో H5N1 వైరస్ పక్షుల నుంచి నేరుగా మానవులకు సోకిన కేసులు నమోదయ్యాయి. ఇందులో మరణాల రేటు కూడా చాలా ఎక్కువగా ఉండటం ఆందోళన కలిగించే విషయం. ఇటీవల కొన్ని క్షీరదాలతో సహా ఇతర జంతు జాతుల్లోనూ ఈ వైరస్ను గుర్తించారు. ఇప్పుడు ఆ కోళ్లకు ముందుగానే ఈ వ్యాక్సిన్ వేయడం ద్వారా.. భవిష్యత్తులో ఈ వైరస్ మనుషులకు సోకకుండా రక్షించుకోవచ్చు. విదేశీ వ్యాక్సిన్లపై ఆధారపడకుండా భారతీయ శాస్త్రవేత్తలు మన రైతుల కోసం, మన దేశీయ అవసరాలకు అనుగుణంగా స్వయంగా బర్డ్ ఫ్లూ వ్యాక్సిన్ను అభివృద్ధి చేయడం నిజంగా మేకిన్ ఇండియా సాధించిన గొప్ప విజయం.



